پاکستان دی عزت سبھ توں پہلاں!

آئی ایم ایف کولوں پیکج لین دی کوئی چھیتی نہیں پر مذاکرات جاری نیں:اسد عمر

پاکستان دی عزت سبھ توں پہلاں!
آئی ایم ایف کولوں پیکج لین دی کوئی چھیتی نہیں پر مذاکرات جاری نیں:اسد عمر

اسلام آباد(پاکستان پوائنٹ نیوز15۔دسمبر۔2018ء) وفاقی وزیر خزانہ اسد عمر دا آکھنا اے کہ عالمی مالیاتی ادارے آئی ایم ایف کولوں پیکج لین دی کوئی چھیتی نہیں اے پر ایس حوالے نال مذاکرات جاری نیں تے پیکج صرف پاکستان دے مفاد نوں مُکھ رکھدے ہوئے لیاجائے گا۔ اوہناں نے آکھیا کہ ساڈی حکومت آئی ایم ایف پروگرام لین لئی اکتوبر توں انٹرنیشنل مانیٹری فنڈ(آئی ایم ایف) نال مذاکرات کر رہی اے۔

اسیں اودوں تیکر ایس پروگرام اُتے دستخط نہیں کراں گے جدوں تیکر سانوں ایہ یقین نہ ہو جائے کہ آئی ایم ایف کولوں لِتا جان والا امدادی پیکج پاکستان دے بہتر مفاد وچ اے۔ اسد عمر نے آکھیا کہ دوست ملکاں ولوں امداد مگروں آئی ایم ایف پروگرام لین دے دباء وچ کمی آئی تے حکومت دے مڈھلے 100دناں دے معاشی اقدامات دی وجہ توں سانوں کُجھ بچت ہوئی جیہدے نال چالو مالی سال دے دوران معیشت چلان وچ مدد ملے گی۔

عرب میڈیا نوں دتے گئے اک انٹرویو چ وفاقی وزیر اسد عمر دا آکھنا سی کہ حکومت دے پہلے 100دناں دے اقدامات دی وجہ توں 6توں 7ارب ڈالر دی بچت ہوئی اے۔ اوہناں نے آکھیاکہ دوست ملکاں ولوں فنڈنگ مگروں کرنٹ اکاؤنٹ کسارا (خسارہ) ہور گھٹ کرن دی کوشش کراں گے۔اوہناں دا آکھنا سی کہ سعودی عرب نال 6ارب ڈالر دے پیکج اُتے اتفاق ہویا تے چین و متحدہ عرب امارات کولوں وی امداد ملن دی آس اے جیہدے نال فارن ایکسچینج ریزرو وچ وادھا ہوئے گا۔