عدالت دا لیگی رہنما افضل کھوکھر تے سیف الملوک کھوکھر دے ناں ای سی ایل وچ پان دا حکم

سبھ جاندے نیں میں جو آکھنا واں اوہ کرنا واں، ساڈے کول تہاڈے خلاف یتیماں تے بیوہ سوانیاں دیاں شکایتاں آئیاں نیں:چیف جسٹس دے ریمارکس

عدالت دا لیگی رہنما افضل کھوکھر تے سیف الملوک کھوکھر دے ناں ای سی ایل وچ پان دا حکم
 سبھ جاندے نیں میں جو آکھنا واں اوہ کرنا واں، ساڈے کول تہاڈے خلاف یتیماں تے بیوہ سوانیاں دیاں شکایتاں آئیاں نیں:چیف جسٹس دے ریمارکس

اسلام آباد(پاکستان پوائنٹ نیوز15۔دسمبر۔2018ء) سپریم کورٹ لاہور رجسٹری وچ چیف جسٹس آف پاکستان میاں ثاقب نثار نے ایل ڈی اے سٹی بارے آپ نوٹس کیس دی سنوائی کیتی۔ عدالتی حکم اُتے مسلم لیگ (ن) دے رہنما افضل کھوکھر تے سیف الملوک کھوکھر عدالت وچ پیش ہوئے۔ سنوائی دوران ایم پی اے افضل کھوکھر دا آکھنا سی کہ اسیں کسے دی جائیداد اُتے قبضہ نہیں کیتا۔

چیف جسٹس نے آکھیا کہ جے قبضہ نکل آیا تے فیر چھڈاں گا نہیں۔ چیف جسٹس نے ریمارکس دتے کہ سبھ جاندے نیں میں جو آکھنا واں اوہ کرنا واں۔ ساڈے کول تہاڈے خلاف یتیماں تے بیوہ سوانیاں دیاں شکایتاں آئیاں نیں۔ کسے وی بیوہ تے یتیم دی جائیداد اُتے قبضہ کرن والے نوں چھڈاں گے نہیں۔ چیف جسٹس دا آکھنا سی کہ بہتر اے جِنیاں وی یتیماں، بیوہ سوانیاں تے اوورسیز دیاں زمیناں اُتے قبضے کیتے اوہ اپنے آپ چھڈ دیو۔

سپریم کورٹ نے ایس موقعے اُتے افضل کھوکھر تے سیف الملوک کھوکھر دا ناں ای سی ایل وچ پان دا حکم وی دتا اے۔ایس توں وکھ سپریم کورٹ نے کھوکھربرادران نوں اپنے تے گھر والیاں دے ناں جائیداداں دیاں تفصیلاں جمع کروان دا حکم وی دتا۔ عدالت نے ایل ڈی اے تے پولیس نوں کھوکھر برادران کولوں ناجائز قبضے چھیتی چھڈوان دا وی حکم دتا اے۔