تھائی لینڈ(پاکستان پوائنٹ نیوز24۔جنوری2017ء) تھائی لینڈ نے خیبر پختونخوا حکومت دے تن افسراں نوں مبینہ جنسی حملیاں دے الزام پاروں ڈی پورٹ کر دِتا۔ سینئر افسر نے دسیا کہ خیبر پختونخوا دے محکما پبلک پراسیکیوشن وچ نویں شامل ہون والے 25افسر امریکا ولوں دِتے گئے فنڈز اُتے ٹریننگ لئی تھائی لینڈ دے شہر بنکاک گئے سن۔ تھائی لینڈ وچ ملازم تے ہور سوانیاں نے دسیا کہ ذکر کیتے گئے افسراں نے سوئمنگ پول وچ مبینہ طور اُتے سوانیاں نوں ہراساں کیتا۔
جہدے بعد سوانیاں نوں مبینہ طور اُتے ہراساں کرن والے تن بندیاں نوں مقامی پولیس نے گرفتار کرن دے بعد ملکوں کڈھ دِتا۔ محکما پراسیکیوشن دے دو افسراں ناں نہ لین دی شرط اُتے دسیا کہ تِنے افسر مِتھے گئے شیڈول توں دو دن پہلے ای تھائی لینڈ توں ڈی پورٹ ہو کے پاکستان آگئے سن جدکہ باقی بندے ہفتے نوں ملک واپس پرتے۔ ایہناں افسراں نوں تھائی لینڈ وچ مینجمنٹ آف کیس تے پبلک پراسیکیوٹرز دی حیثیت نال فرض نبھان بارے ٹریننگ لئی بنکاک گھلیا گیا سی۔
ڈی پورٹ کیتے گئے افسراں خلاف تحقیقات شروع کر دِتیاں گئیاں نیں۔ انکوائری وچ شامل اک افسر نے آکھیا کہ ایہناں تناں افسراں نہ صرف صوبے دا سِر شرم نال نیواںکیتا اے بلکہ اپنے ملک دا ناں وی بدنام کیتا۔ اوہناں دا کہنا سی کہ ایہناں افسراں دے ایس فعل دے بعد حکام ایس تربیتی پروگرام نوں سبوتاژ کر سکدے سن۔
