پشاور(پاکستان پوائنٹ نیوز15۔دسمبر۔2018ء) خیبرپختونخوا حکومت نے وزیر اعظم عمران خان نوں ماموں بنا دتا اے۔تفصیل دے مطابق صوبائی حکومت نے نشے دے عادی بندیاں لئی قائم کیتے بحالی مرکز نوں شیلٹر ہوم بنا کے وزیر اعظم عمران خان کولوں افتتاح کروا دتا۔ افتتاح دے کُجھ چِر مگروں ای شیلٹر ہوم نوں تالے لا دتے گئے۔حکومت دے ایس کم نال منشیات دے عادی بندے بحالی مرکز توں محروم ہو گئے نیں۔
وزیراعظم ولوں شیلٹر ہوم دا افتتاح پچھلے دیہاڑٰے کیتا گیا جیہدے کُجھ چِر مگروں ای شیلٹر ہوم نوں تالے لاکے بند کر دتا گیا۔ خیبرپختونخوا حکومت دے ایس کم نال نشے دے عادی بندیاں دی بحالی لئی حکومتی کارکردگی اُتے سوالیہ نشان لگ گیا اے۔یاد رہوے کہ پچھلے دیہاڑے پشاور وچ وزیر اعظم عمران خان نے افتتاح کیتا سی۔ ایس موقعے اُتے تقریب نال خطاب کردے ہوئے اوہناں دا کہنا سی کہ کے پی کے والے دوجی واری نہیں دیندے پر سانوں دوجی وار دتی۔
الیکشن وچ دھاندلی خلاف اسیں ہر حلقہ کھولن نوں تیار آں۔ پچھلی حکومت نے ارباں رُپئے دے فنڈز الیکشن وچ خرچ کیتے۔ اسیں ایس لئی کے پی کے وچ جِتے کہ لوکاں دی زندگی خشحال کیتی۔ لوکاں نے سمجھیا کہ اسیں وعدے نہیں کیتے پر کوشش کیتی ۔ اوہناں نے آکھیا کہ محمود خان اک سادہ تے سچا انسان اے۔ مینوں اوہناں دی ایمانداری اُتے پورا بھروسہ اے۔ جے کوئی بندہ جِنا وی عقلمند ہوئے پر جے اوہ ایماندار تے دیانتدار نہیں تے اوہدا کوئی فائدہ نہیں۔
اوہناں د اآکھنا سی کہ پنجاب دے لوکاں نے عثمان بزدار دا مذاق اُڈایا۔ پنجاب دے لوکاں نوں اجیہے وزیر اعلا دی عادت سی جو گڈیاں دے پروٹوکول اُتے 35کروڑ خرچ کر دیندا سی۔ پر ایتھے اک سادہ تے دلیر وزیر اعلا اے۔ اسیں مافیا خلاف کھلو گئے آں۔ ایس طرحاں ایہ دوویں وزیر اعلا کسے دے دباء وچ نہیں آن گے۔ مینوں خشی ہوئی جدوں محمود خان نے شیلٹر ہوم وکھایا جو اوہناں نے غریباں لئی بنایا اے۔ اوہناں نے غریباں لئی ناں ’مہمان خانہ‘ رکھیا اے۔
