پشاور شیلٹر ہوم وچ رات لنگھان والے مسافر وزیر اعظم عمران خان دے شکر گزار

پشاور شیلٹر ہوم وچ رات لنگھان والے مسافر وزیر اعظم عمران خان دے شکر گزار

پشاور(پاکستان پوائنٹ نیوز15۔دسمبر۔2018ء) پشاور وچ وزیر اعظم عمران خان نے پچھلے دیہاڑے شیلٹر ہوم دا افتتاح کیتا۔ وزیر اعظم عمران خان ولوں افتتاح مگروں پشاور دے 5مختلف علاقیاں وچ سرکاری مہمان خانیاں وچ مسافراں دے آن دا سلسلا جاری اے۔ شیلٹر ہوم وچ رات لنگھان والے اک مسافر دا آکھنا سی کہ میں مالاکنڈ توں ایتھے ڈاکٹر کول آیا سی پر مینوں ڈاکٹر کولوں علاج لئی ویلا نہیں ملیا۔ میں ایتھوں لنگھ رہیا سی تے مینوں پتا چلیا کہ وزیر اعظم عمران خان نے ساڈے ورگیاں لئی مہمان خانیاں دا بوہا کھول دتا اے تے رب دا شکر اے کہ میری رات ایتھے بہت چنگی لنگھی اے۔ ایس توں پہلاں میں فٹ پاتھ اُتے سوندا سی تے مینوں لوک تے پولیس والے وی تنگ کردے سن۔ اک ہور مسافر دا آکھنا سی کہ میرا تعلق سوات توں اے تے میں جدوں پہلے ایتھے آیا سی تے مینوں فٹ پاتھ اُتے سونا پیا سی پر اسیں عمران خان دے شکر گزار آں جیہناں دی وجہ توں ساڈی رات سکون نال لنگھی اے۔ یاد رہوے کہ پچھلے دیہاڑے پشاور وچ وزیر اعظم عمران خان نے شیلٹر ہوم دا افتتاح کیتا سی۔ ایس موقعے اُتے تقریب نال خطاب کردے ہوئے اوہناں دا کہنا سی کہ کے پی کے والے دوجی واری نہیں دیندے پر سانوں دوجی وار دتی۔ الیکشن وچ دھاندلی خلاف اسیں ہر حلقہ کھولن نوں تیار آں۔ پچھلی حکومت نے ارباں رُپئے دے فنڈز الیکشن وچ خرچ کیتے۔ اسیں ایس لئی کے پی کے وچ جِتے کہ لوکاں دی زندگی خشحال کیتی۔ لوکاں نے سمجھیا کہ اسیں وعدے نہیں کیتے پر کوشش کیتی ۔ اوہناں نے آکھیا کہ محمود خان اک سادہ تے سچا انسان اے۔ مینوں اوہناں دی ایمانداری اُتے پورا بھروسہ اے۔ جے کوئی بندہ جِنا وی عقلمند ہوئے پر جے اوہ ایماندار تے دیانتدار نہیں تے اوہدا کوئی فائدہ نہیں۔اوہناں د اآکھنا سی کہ پنجاب دے لوکاں نے عثمان بزدار دا مذاق اُڈایا۔ پنجاب دے لوکاں نوں اجیہے وزیر اعلا دی عادت سی جو گڈیاں دے پروٹوکول اُتے 35کروڑ خرچ کر دیندا سی۔ پر ایتھے اک سادہ تے دلیر وزیر اعلا اے۔ اسیں مافیا خلاف کھلو گئے آں۔ ایس طرحاں ایہ دوویں وزیر اعلا کسے دے دباء وچ نہیں آن گے۔ مینوں خشی ہوئی جدوں محمود خان نے شیلٹر ہوم وکھایا جو اوہناں نے غریباں لئی بنایا اے۔ اوہناں نے غریباں لئی ناں ’مہمان خانہ‘ رکھیا اے۔