(ن) لیگ دیاں دھمکیاں مگروں سپریم کورٹ توں درخاست کراں گا کہ اوہ رینجرز بلالووے: عارف حمید بھٹی

اسلام آباد(پاکستان پوائنٹ نیوز24۔جنوری2017ء) نجی ٹی وی چینل دے اک پروگرام وچ گل بات کردے ہوئے مشہور پرچا کار عارف حمید بھٹی نے آکھیا کہ (ن) لیگی رہنما جس طرحاں دھمکیاں دے رہے نیں سپریم کورٹ نوں چاہیدا کہ اوہ ججاں دی سکیورٹی لئی رینجرز نوں سَد لووے۔ اوہناں نے آکھیا کہ سپریم کورٹ وچ پاناما کیس دی سنوائی کرن والے معزز ججاں نوں چھیتی سکیورٹی دینی چاہیدی تے جدوں (ن) لیگی رہنما یاں کارکن پاناما کیس دی سنوائی وچ رلت ہون لئی سپریم کورٹ آﺅندے نیں اوہناں دیاں جیباں دی تلاشی وی ہونی چاہیدی۔ عارف حمید نے آکھیا کہ مینوں ہن خوف نظر آ رہیا اے کیونکہ جو لوک ایہ آکھدے نیں کہ وزیر اعظم نوں گھر نہیں گھلیا جا سکدا، اوہ کُجھ خطرناک کم کرن گے۔ حکومت نوں تنقید دا نشانا بناندے ہوئے اوہناں نے آکھیا کہ ایہ جو آکھدے نیں کہ وزیر اعظم نوں نااہل نہیں کیتا جا سکدا اوہ دَسن کہ ایس ملک اندر عدالتاں کیوں بنائیاں گئیاں نیں؟جے کوئی وی ایم پی اے یاں ایم این اے بنیا اے تے اوہ لوکائی دا ووٹ لے کے چُنیا گیا اے ایہدا مطلب ایہ نہیں کہ ایم پی اے یاں ایم این اے بنن مگروں اوہ وی لُٹ مار یاں قتلام کرے۔ اوہناں نے ہور کیہ آکھیا تُسیں وی سنو!