اے پی ایس دے شہیداں دے ناں اُتے کرپشن دا بازارگرم

اسلام آباد(پاکستان پوائنٹ نیوز17۔دسمبر2016ء) نجی ٹی وی چینل دے اک پروگرام وچ گل بات کردے ہوئے ڈاکٹر ظہور اسلام نامی اک پروہنے نے آکھیا کہ اے پی ایس دُکھانت وچ شہید تے زخمی ہون والے بالاں دے ناں اُتے وی کرپشن ہوئی جو ساڈی بدقسمتی اے کہ اسیں اینے بے حس معاشرے وچ رہندے آں۔ اوہناں نے انکشاف کیتا کہ خیبرپختونخوا دی حکومت نوں اے پی ایس حملے وچ زخمی ہون والے پڑھیار تے اُستاداں دے علاج لئی ساڈھے 19کروڑ رُپئے دِتے گئے جہدے بعد اک میڈیکل بورڈ بنا دِتا گیا، اوہ بورڈ غیر قانونی تے ان پڑھ لوکاں اُتے مشتمل سی۔ اوہناں نے دسیا کہ اے پی ایس حملے وچ زخمی ہون والے بالاں دے علاج معالجے دے سارے پیسے خیبرپختونخوا حکومت دی بجائے سندھ حکومت نے دِتے۔ اوہناں دا کہنا سی کہ میرا سوال ایہ اے کہ کے پی کے حکومت نوںد ِتا گیا اوہ پیسہ کتھے تے کہدے کول اے؟ کے پی کے حکومت نے بے حسی دا وکھالا کردے ہوئے ایس قسم دی کرپشن کیوں کیتی؟ ڈاکٹر ظہور نے ہور آکھیا کہ کے پی کے حکومت دی ایس کرپشن دے سارے آڈٹس تے ثبوت موجود نیں جہناں نوں ویلا آن اُتے ساہمنے لیاندا جائے گا۔