اسلام آباد(پاکستان پوائنٹ نیوز06۔دسمبر2016ء) سپریم کورٹ وچ پاناما کیس بارے درخاستاں دی سنوائی ہوئی۔ سنوائی وچ وقفے دے دوران میڈیا نال گل بات کردے ہوئے پی ٹی آئی رہنما نعیم الحق دا کہنا سی کہ اسیں سمجھدے آں کہ اسیں نواز شریف خلاف کیس اج ثابت کر دِتا اے۔ اوہناں نے آکھیا کہ ساڈے وکیل نعیم بخاری نے اج عدالت وچ دلائل دِتے جہدے بعد عدالت نوں وی حالات بارے اپنے آپ پتا لگ گیا اے۔
فواد چودھری نے میڈیا نال گل بات وچ دسیا کہ اج دے دلائل مریم نواز دے کفالت ہیٹھ ہون دے سن۔ اوہناں دا کہنا سی کہ اج دے دلائل وچ وزیر اعظم دے بیان، جدہ وچ لائی گئی سٹیل مل تے مریم نواز دے حسین نواز دی کمپنی دی ٹرسٹی ہون اُتے سن۔ فواد چودھری نے دسیا کہ اج دے دلائل وچ مریم صفدر نواز شریف دی کفالت ہیٹھ ہون دا ثابت کر دِتا گیا اے۔ فواد چودھری نے آکھیا کہ مریم نواز دا سفری خرچ 2ورھیاں وچ 36لکھ رُپئے اے جو اوہناں دی آمدن توں زیادا اے۔
اوہناں نے آکھیا کہ اپنے انٹرویو وچ حسن نواز مَن چکے نیں کہ فلیٹس دا کرایہ پاکستان توں آﺅندا سی، حسن نواز شریف نے 1999وچ اک انٹرویو دوران آکھیا کہ اوہ طلب علم نیں ۔ حسین نواز نے وی آکھیا کہ فلیٹ دا کرایہ پاکستان توں آﺅندا سی۔ یاد رہوے کہ پاناما کیس دی سنوائی وچ ادھے گھنٹے دا وقفا اے جہدے بعد کیس دی دوبارا سنوائی شروع ہووے گی۔
