اسلام آباد(پاکستان پوائنٹ نیوز28۔نومبر۔2016ء) نویں آرمی چیف دے طور اُتے جنرل قمر جاوید باجوہ دا ناں ساہمنے آ گیا اے، جنرل قمر جاوید باجوہ دہشتگردی دے ملک توں خاتمے سنے 5ترجیحاں اُتے کم کرن گے۔ جنرل قمر باجوہ ہشت گردی نوں پاکستان لئی سبھ توں وڈا خطرا سمجھدے نیں۔ اوہناں نے بطور سخت جان فوجی دہشت گردی نوں ملک وچ سبھ توں وڈا خطرا قرار دِتا۔
نویں آرمی چیف قمر جاوید باجوہ دا مقصد ہر سطح اُتے موجود دہشت گردی دا مکمل خاتمہ کرنا اے۔ دفاعی امور دے وسیلیاں نے دسیا کہ قمر جاوید باجوہ دیاں ترجیحاں وچ ملک بھر وچ امن دے قیام لئی حکومت نال رلکے موثر پالیسی بنان وچ تعاون کرن، ملک دشمناں خلاف کارروائیاں، ملک نوں دہشت گرداں توں پاک کرنا، آپریشن ضرب عضب و کراچی آپریشن دے نشانے حاصل کرنا، دہشت گرد تنظیماں، دہشت گرداں دے سہولت کاراں دا خاتما کرنا تے پاک چین اقتصادی راہداری دا تحفظ کرنا شامل اے۔
جنرل قمر باجوہ نے کرنل دے عہدے اُتے ہن تیک بہادری دیاں کئی مثالاں وی قائم کیتیاں، ایہو وجہ اے کہ سیاچن وچ تعیناتی پاروں اک پوسٹ دا ناں اوہناں دے ناں ’باجوہ‘ نال رکھیا گیا اے۔ فوج دے کُجھ وسیلیاں نے دسیا کہ جنرل قمر سیاسی معاملات اُتے چنگی رائے رکھدے نیں تے جنرل قمر جاوید باجوہ سیاسی معاملات اُتے رائے دین توں پرہیز کردے نیں۔ وسیلیاں دے مطابق جنرل قمر جاوید فوری فیصلا کرن دی غیر معمولی صلاحیت رکھن دے نال نال پاک فوج وچ تربیت تے مہارت وچ ہور بہتری دے خاہشمند نیں جدکہ اوہناں توں ایہ امید کیتی جا رہی اے کہ اوہ ملکی دفاع لئی نویں حکمت عملی وی تیار کر سکدے نیں۔
