نویں آرمی چیف جنرل قمر جاوید باوجوہ دی تقرری دے بعد اہم فیصلےاںاُ تے پیش رفت دی امید

نویں آرمی چیف جنرل قمر جاوید باوجوہ دی تقرری دے بعد اہم فیصلےاںاُ تے پیش رفت دی امید

اسلام آباد(پاکستان پوائنٹ نیوز28۔نومبر۔2016ء) نویں آرمی چیف جنرل قمر جاوید باجوہ دی تقرری دے بعد ای حکومت نے اہم معاملات اُتے پیش رفت کرن بارے غور شروع کر دتا اے۔ تفصیل دے مطابق مسئلا کشمیر، لائن آف کنٹرول دی صورتحال، افغان مہاجراں دی ملک واپسی، نیشنل ایکشن پلان اُتے عملددرآمد سنے کئی اہم معاملات اُتے غور تے مشورا شروع کر دِتا گیا اے جدکہ جلدی ای کشمیر دے معاملے نوں اُجاگر کرن لئی سول قیادت تے نویں فوجی قیادت وچ مشورا ہووے گا، نویں چُنے گئے آرمی چیف جنرل قمر جاویدباجوہ نوں مشرقی بارڈر اُتے سکیورٹی بارے کئی تجربے حاصل نیں۔

پاک بھارت کشیدگی اُتے گل بات کرن تے اوہدے نال نبڑن لئی نویں آرمی چیف جنرل قمر جاوید باجوہ نوں بالکل ٹھیک بندا قرار دِتا جا رہیا اے کیوں جے اوہ پہلے وی ایس قسم دے معاملات نوں چنگے طریقے نال نبیڑ چکے نیں۔ اک حکومتی وسیلے دا کہنا سی کہ مغربی سرحداں اُتے سکیورٹی بہتر رکھن لئی فوج دا اہم کردار اے۔ حکومت نے کشمیر نوں عالمی سطح اُتے اُجاگر رکھن لئی حریت رہنماواں نال ملاقاتاںکرن،مسئلا کشمیر نوں سرکاری تے سیاسی اقدامات اُتے مشتمل دو ٹوک حکمت عملی تیار کرن دا فیصلا کیتا اے۔

وسیلیاں نے دسیا کہ ایس بارے اجے حتمی فیصلا نہیں کیتا گیا کیوں جے حکومت نے اجے نویں فوجی قیادت نال مشورا کرنا اے۔ وسیلیاں دے مطابق لائن آف کنٹرول نیڑے موجود آبادیاں نوں انسانی حقوق دے تحت مدد فراہم کرن اُتے وی حکومت تے سکیورٹی کمانڈر لائن آف کنٹرول ولوں ترجیح دتی جائے گی جہدے تحت اوہناں نوں بھارتی فائرنگ توں بچان لئی محفوظ تھاواں اُتے منتقل کیتا جائے گا۔

آل پارٹیز حریت کانفرنس دے سربراہ سید یوسف نسیم دا کہنا سی کہ سانوں امید اے کہ حکومت ، فوجی قیادت تے کشمیری حکومت عالمی سطح اُتے مسئلا کشمیر نوں دبان لئی بھارتی ہتھکنڈیاں نوں ناکام بنان گے۔ اوہناں نے آکھیا کہ سیاسی تے سفارتی سطح اُتے حریت قیادت ہر ممکن تعاون فراہم کرن نوں تیار اے۔ پاکستان وچ وسن والے 10لکھ مہاجراں بارے وسیلیاں دا کہنا سی کہ ایہناں دی واپسی اک ہور مسئلا اے جہدے اُتے حکومتی ادارے نویں فوجی قیادت نال مشورا کرن گے جدکہ حکومت ولوں جاری بیان دے مطابق افغان مہاجرین نوں آن والے ورھے ملک واپس گھلن دا فیصلا کیتا گیا اے پر ایہدے اُلٹ حکومتی وسیلیاں نے دسیا کہ اجے تیکر افغان مہاجراں دی ملک واپسی بارے تاریخ نہیں مِتھی گئی۔

وسیلیاں دا کہنا اے کہ بھاویں 23نومبر نوں ہون والی کابینہ میٹنگ وچ شامل 16نکاتی ایجنڈے وچ افغان مہاجراں دی واپسی دا نکتہ شامل نہیں سی پر وفاقی وزیر برائے اطلاعات و نشریات دا کہنا سی کہ افغان مہاجراں نوں آن والے ورھے دسمبرتیک ملک واپس گھل دِتا جائے گا۔