اسلام آباد(پاکستان پوائنٹ نیوز03۔نومبر۔2016ء) سپریم کورٹ وچ پاناما لیکس خلاف دائر درخاستاں دی سنوائی ہوئی۔ سنوائی وچ وزیرا عظم نواز شریف دے وکیل نے اوہناں دا جواب جمع کروا دِتا۔ تفصیل دے مطابق سنوائی دوران وزیراعظم نے اپنا جواب جمع کروا دِتا۔ جہدے وچ وزیر اعظم نواز شریف دا کہنا سی کہ میں بیرون ملک جائیداداں دا مالک نہیں، اوہناں نے آکھیا کہ میں آف شور کمپنیاں دا وی مالک نہیں آں۔
وکیل ولوں جمع کروائے گئے جواب وچ وزیراعظم نواز شریف نے آکھیا کہ میں آئین دے آرٹیکل 62تے 63 اُتے پورا لتھدا آں۔ اپنی آمدن تے جائیدار دیاں تفصیلاں باقاعدگی نال جمع کروانا واں۔ وزیر اعظم دا کہنا سی کہ اپنے ٹیکس تے گوشوارے وی جمع کرواندا واں۔ جہدے اُتے جسٹس سعید نے وکیل نوں آکھیا کہ وزیر اعظم دے تن بچیاں ولوں جواب جمع کیوں نہیں کروایا گیا؟اصل فریق دا جواب تے آیا ای نہیں، کیہ تُسیں آن والے ورھے جمع کراﺅ گے۔
اوہناں نے خفگی دا اظہار کردے ہوئے آکھیا کہ سانوں پتا ہوندا تے اسیں عدالت ای نہ لاندے، جے قانون دے مطابق جواب جمع نہ کروایا گیا تے اسیں الزام نوں مَن لواں گے۔ اوہناں دا کہنا سی کہ ایہ گل لِکھ کے دیو کہ مریم نواز اپنے والد نواز شریف دی کفالت وچ نہیں نیں، عدالت نے مکالمہ کیتا کہ تُسیں ساڈا ویلا ضائع کر رہے او۔ وزیر اعظم دے وکیل نے اک ہفتے دی مہلت دی استدعا کیتی جہدے اُتے جسٹس عظمت سعید نے آکھیا کہ تُسیں جواب جمع کروانا چاہندے او؟ عدالت نے وزیر اعظم دے وکیل دی اک ہفتے دی مہلت دی استدعا رَد کردے ہوئے کیس دی سنوائی پیر تیکر معطل کردے ہوئے وزیر اعظم دے بالاں کولوں جواب منگ لیا۔
