اسلام آباد(پاکستان پوائنٹ نیوز03۔نومبر۔2016ء) کراچی وچ دو مسافر گڈیاں وچکار ٹکر دے نتیجے وچ ہلاک ہون والیاں دی گنتی 20 ہو گئی اے جدکہ 60 مسافر زخمی نیں۔ حکام دا کہنا اے کہ کراچی دے لانڈھی ریلوے سٹیشن دے نیڑے زکریا ایکسپریس تے فرید ایکسپریس وچکار ٹکر پاروں ایہ حادثا ہویا۔ حادثے دے نتیجے وچ تن بوگیاں پَٹری توں لتھ گئیاں۔ تفصیل دے مطابق کراچی دے علاقے جمعہ گوٹھ ریلوے سٹیشن اُتے ایہ حادثا اوس ویلے ہویا جدوں فرید ایکسپریس مسافراں نوں گڈی توں لاہ رہی سی کہ ایس دوران پچھوں آن والی زکریا ایکسپریس اوہدے نال ٹکرا گئی۔
حادثے دے نتیجے وچ موقعے اُتے نس بھج پے گئی تے ریسکیو ٹیماں نے موقعے اُتے پہنچ کے زخمی مسافراں نوں عباسی تے سول ہسپتال منتقل۔ریلوے حکام دے مطابق لانڈھی حادثے پاروںکراچی توں اندرون ملک جان تے آن والیاں گڈیاں نوں روک دِتا گیا اے، ریلوے حکام دا کہنا سی کہ اک سگنل خراب سی جہدے پاروں ڈرائیور نوں کھلوتی گڈی دا نہ پتا چلیاجدکہ ایس حوالے نال ہور تحقیقات وی جاری نیں۔
جناح ہسپتال دی ترجمان ڈاکٹر سیمی جمالی دے مطابق ہسپتال وچ 18لاشاں تے 60 زخمیاں نوں لیاندا گیا جہناں وچوں ڈاڈھے زخماں پاروں دو زخمی ہور دَم دے گئے نیں جدکہ ہور 5زخمیاں دی حالت خطرے وچ اے۔حادثے دے حوالے نال اک عینی شاہد دا کہنا سی کہ سگنل لَمے چِر توں خراب سی۔دوجے پاسے وزیر اعظم نواز شریف تے صدر مملکت ممنون حسین نے حادثے اُتے ہِرکھ دا وکھالا کردے ہوئے زخمیاں نوں ہر ممکن ڈاکٹری سہولتاں دین دی ہدایت کیتی اے۔
