سیالکوٹ(پاکستان پوائنٹ نیوز13۔اکتوبر۔2018ء) کراچی ، جھنگ تے حیدر آباد مگروں سیالکوٹ دا اک شہری وی راتوں رات کروڑ پتی بن گیا، شہری دے اکاؤنٹ وچوں 7کروڑ 44لکھ76ہزار322دی ٹرانزیکشن ہوئی۔تفصیل مطابق سیالکوٹ دے شہری مذاکر حسین مطابق اوہ نجی بنک وچ اکاؤنٹ کھلوان لئی گیا تے پتا لگا کہ اوہدے ناں اُتے لاہور وچ پہلے ای اکاؤنٹ کُھلیا ہویا اے۔ جدوں بنک سٹیٹمنٹ کڈھوائی گئی تے 75صفحیاں دی بنک سٹیٹمنٹ مطابق اکاؤنٹ وچوں 7کروڑ 44لکھ76ہزار 322رُپئے دی ٹرانزیکشن ہوئی اے۔
اکاؤنٹ راہیں سوات، مینگورہ تے کراچی توں وڈی رقم منتقل کیتی گئی۔ بنک نے شہری دے اکاؤنٹ دے غلط استعمال دا تصدیقی لیٹر جاری کر دتا۔ نوجوا ن نے ایس خدشے دا اظہار کیتا کہ کیتے اوہدا اکاؤنٹ دہشت گردی لئی نہ ورتیا گیا ہوئے۔یاد رہوے کہ ایس توں پہلاں حیدر آباد دا ڈرائیور راتوں رات کروڑ پتی بن گیا سی۔ ڈرائیور پردیپ کمار اپنے اکاؤنٹ وچ چار کروڑ توں ودھ پیسے ویکھ کے حیران رہ گیا سی۔ ایسے طرحاں جھنگ توں تعلق رکھن والے اک پڑھیار تے کراچی دے علاقے اورنگی ٹاؤن دے غریب فالودہ ویچن والے دے اکاؤنٹ وچ کروڑاں رُپئے آ گئے سن۔
