لاہور(پاکستان پوائنٹ نیوز13۔اکتوبر۔2018ء) قومی ائر لائن پی آئی اے وچ ناقص پالیسیاں دے ذمے وار افسراں خلاف سخت کارروائی دے مطالبے دی قرار داد پنجاب اسمبلی وچ جمع کروا دتی گئی۔ مسلم لیگ(ق) دی رکن صوبائی اسمبلی خدیجہ عمر ولوں جمع کروائی گئی قرارداد دے متن وچ آکھیا گیا اے کہ پی آئی اے وچ نہ باکمال لوک تے نہ ای لاجواب سروس، قومی ائر لائن بہتر کارکردگی نہ وکھان دی وجہ توں پوری دنیا وچ پاکستان دی بدنامی دی وجہ اے۔
روز گھٹو گھٹ 5توں 7اُڈاناں لیٹ ہوندیاں نیں۔ دیر دی وجہ توں ملکی تے غیر ملکی مسافراں نوں اوکڑاں دا ساہمنا کرنا پیندا اے۔ کدی انجن دی مرمت تے کدی فنی خرابی دا بہانہ بنا کے اُڈاناں وچ دیر کیتی جاندی اے، جیہدی وجہ توں کروڑاں رُپئے دا نقصان ہو رہیا اے پر قومی ائر لائن دے افسر ٹس توں مس نہیں ہوندے۔ قرارداد وچ آکھیا گیا کہ قومی ائر لائن دی کارکردگی نوں بہتر بنان لئی بہتر اقدامات کیتے جان۔ دنیا بھر وچ بدنامی توں بچن لئی ایس ادارے دیاں خامیاں دور کیتیاں جان۔ قرارداد وچ حکومت پاکستان توں منگ کیتی گئی اے کہ اوہ اِنج دے سارے افسراں خلاف کارروائی کرے جو خرابی دے ذمے وار نیں۔
