اسلام آباد(پاکستان پوائنٹ نیوز10۔اکتوبر۔2018ء) مسلم لیگ (ن) دے صدر و قومی اسمبلی وچ اپوزیشن لیڈر شہباز شریف دے پروڈکشن آرڈر جاری کر دتے گئے نیں۔ تفصیل مطابق شہباز شریف دے پروڈکشن آرڈر لئی اپوزیشن نے قومی اسمبلی وچ درخاست دتی سی۔ قومی اسمبلی سیکرٹریٹ نے اج اپوزیشن لیڈر شہباز شریف دے پروڈکشن آرڈر جاری کیتے۔ آرڈر دے تحت جدوں وی قومی اسمبلی دا اجلاس ہوئے گا، شہباز شریف نوں قومی اسمبلی وچ لیاندا جائے گا تے اوہ قومی اسمبلی دے اجلاس وچ رلتی ہون گے۔
یاد رہوے کہ 5 اکتوبر نوں مسلم لیگ (ن) دے صدر و قومی اسمبلی وچ اپوزیشن لیڈر شہباز شریف نوں گرفتار کرن مگروں اگلے دن احتساب عدالت وچ پیش کیتا گیا۔ احتساب عدالت دے جج نجم الحسن نے کیس دی سنوائی کیتی۔ شہباز شریف نوں نیب عدالت وچ پیش کیتا گیا تے اوہناں نے مقدمے دی سنوائی کُھلی عدالت وچ کرن دی منگ کیتی تے آکھیا کہ میں چیمبر وچ سنوائی نہیں کروانا چاہندا۔
جیہدے اُتے احتساب عدالت دے جج نجم الحسن نے اوہناں دی منگ منظور کردے ہوئے کُھلی عدالت وچ سنوائی کیتی۔ احتساب عدالت وچ شہباز شریف اپنے حق وچ بولے۔ اوہناں دا کہنا سی کہ میں کوئی کرپشن نہیں کیتی۔ میں اپنی ذاتی مداخلت نال کئی ارب رُپئے بچائے، میں اپنی نیندر تے صحت خراب کیتی۔ اوہناں نے آکھیا کہ اورنج لائن ٹرین منصوبے وچ 75ارب رُپئے بچائے، غیر قانونی طور اُتے کوئی کم نہیں کیتا۔مقدمہ سیاسی بنیاد اُتے بنایا گیا۔اک دھیلے دی کرپشن نہیں کیتی۔ ایس موقعے تے نیب نے شہباز شریف دے 15دناں دے جسمانی ریمانڈ دی منگ کیتی پر احتساب عدالت نے 10دناں دے جسما نی ریمانڈ اُتے شہباز شریف نوں نیب دے حوالے کر دتا۔
