پشاور(پاکستان پوائنٹ نیوز10۔اکتوبر۔2018ء) پاکستان تحریک انصاف نے خیبرپختونخوا وچ حکومت بنائی تے اوہنے کئی سرکاری محکمیاں وچ اصلاحات لیاندیاں۔حکومت نے خاص طور اُتے پولیس، تعلیم تے صحت دے محکمے ول اُچیچی توجہ دتی۔ خیبرپختونخوا دی لوکائی نے صحت دے شعبے وچ تبدیلیاں لیان اُتے حکومت دی ایس کوشش نوں سلاہیا تے اک وار فیر صوبے وچ حکومت کرن دا پی ٹی آئی نوں موقع دتا۔ پر ہن لوکائی دے پیسیاں نال انصاف دا بھانڈا بھج گیا اے۔ مائیکرو بلاگنگ ویب سائٹ ٹویٹر اُتے اپنے ٹویٹر اکاؤنٹ توں اک پرچا کار نے خیبرپختونخوا وچ ضائع کیتیاں جان والیاں دوائیاں دی تصویر شیئر کردے ہوئے آکھیا کہ خیبرپختونخوا دے ضلع بٹگرام وچ لکھاں رُپئے دیاں سرکاری دوائیاں دا ایہ ڈھیر کسے ہسپتال وچ نہیں بلکہ ندی کنڈھے پیا اے۔
ہسپتالاں وچ لوکائی دے ٹیکس نال آن والیاں سرکاری دوائیاں لوکائی نوں دین دی بجائے سٹاک کر دتیاں گئیاں، جیہناں نوں استعمال دی مدت دا ویلا لنگھن مگروں ضائع کر دتاگیا۔تصویراں ساہمنے آن مگروں سوشل میڈیا ورتیندڑاں ولوں حکومت نوں تنقید دا نشانہ بنایا جا رہیا اے۔ لوکاں دا آکھنا اے کہ روگی بغیر دوائیاں دے مر رہے نیں پر حکومت دوائیاں سٹاک وچ رکھ کے ضائع کر رہی اے۔
