لاہور(پاکستان پوائنٹ نیوز06۔اکتوبر۔2018ء) احتساب عدالت نے مسلم لیگ (ن) دے صدر و اپوزیشن لیڈر قومی اسمبلی شہباز شریف نوں 10دناں دے جسمانی ریمانڈ اُتے نیب دے حوالے کر دتا۔ تفصیل مطابق صدر مسلم لیگ (ن) و اپوزیشن لیڈر قومی اسمبلی شہباز شریف نوں اج احتساب عدالت وچ پیش کیتا گیا۔ احتساب عدالت دے جج نجم الحسن نے کیس دی سنوائی کیتی۔ شہباز شریف نوں نیب عدالت وچ پیش کیتا گیا تے اوہناں نے مقدمے دی سنوائی کُھلی عدالت وچ کرن دی منگ کیتی تے آکھیا کہ میں چیمبر وچ سنوائی نہیں کروانا چاہندا۔
جیہدے اُتے احتساب عدالت دے جج نجم الحسن نے اوہناں دی منگ منظور کردے ہوئے کُھلی عدالت وچ سنوائی کیتی۔ احتساب عدالت وچ شہباز شریف اپنے حق وچ بولے۔ اوہناں دا کہنا سی کہ میں کوئی کرپشن نہیں کیتی۔ میں اپنی ذاتی مداخلت نال کئی ارب رُپئے بچائے، میں اپنی نیندر تے صحت خراب کیتی۔ اوہناں نے آکھیا کہ اورنج لائن ٹرین منصوبے وچ 75ارب رُپئے بچائے، غیر قانونی طور اُتے کوئی کم نہیں کیتا۔مقدمہ سیاسی بنیاد اُتے بنایا گیا۔اک دھیلے دی کرپشن نہیں کیتی۔ ایس موقعے تے نیب نے شہباز شریف دے 15دناں دے جسمانی ریمانڈ دی منگ کیتی پر احتساب عدالت نے 10دناں دے جسما نی ریمانڈ اُتے شہباز شریف نوں نیب دے حوالے کر دتا۔
