لاہور(پاکستان پوائنٹ نیوز06۔اکتوبر۔2018ء) مسلم لیگ (ن) دے صدر و قومی اسمبلی وچ اپوزیشن لیڈر شہباز شریف نوں پچھلے دیہاڑے نیب نے گرفتار کیتا، جیہدے مگروں اج اوہناں نوں احتساب عدالت وچ پیش کیتا گیا۔ احتساب عدالت دے جج نجم الحسن نے کیس دی سنوائی کیتی۔ شہباز شریف نوں نیب عدالت وچ پیش کیتا گیا تے اوہناں نے مقدمے دی سنوائی کُھلی عدالت وچ کرن دی منگ کیتی تے آکھیا کہ میں چیمبر وچ سنوائی نہیں کروانا چاہندا۔
جیہدے اُتے احتساب عدالت دے جج نجم الحسن نے اوہناں دی منگ منظور کردے ہوئے کُھلی عدالت وچ سنوائی کیتی۔ احتساب عدالت وچ شہباز شریف اپنے حق وچ بولے۔ اوہناں دا کہنا سی کہ میں کوئی کرپشن نہیں کیتی۔ میں اپنی ذاتی مداخلت نال کئی ارب رُپئے بچائے، میں اپنی نیندر تے صحت خراب کیتی۔ اوہناں نے آکھیا کہ اورنج لائن ٹرین منصوبے وچ 75ارب رُپئے بچائے، غیر قانونی طور اُتے کوئی کم نہیں کیتا۔
مقدمہ سیاسی بنیاد اُتے بنایا گیا۔اک دھیلے دی کرپشن نہیں کیتی۔ ایس موقعے تے نیب نے شہباز شریف دے 15دناں دے جسمانی ریمانڈ دی منگ کیتی پر احتساب عدالت نے 10دناں دے جسما نی ریمانڈ اُتے شہباز شریف نوں نیب دے حوالے کر دتا۔دوجے پاسے شہباز شریف دی گرفتاری اُتے مرکزی قیادت دے کسے رہنما نے وی فوری کوئی بیان نہیں دتا بلکہ نواز شریف تے مریم نواز ولوں وی کوئی ردعمل نہ آنا وی حیرانگی دی گل اے۔
پارٹی قائد نواز شریف نے شہباز شریف دی گرفتاری دے کافی چِر بعد ردعمل دیندے ہوئے حکومت نوں خبردار کیتا تے آکھیا کہ بدترین انتقام دی ذمے وار پی ٹی آئی دی حکومت اے۔ نظام قدرت اے جیویں کرو گے انج ای بھرو گے، حکومت جو سلوک کر ے گی اوہدے لئی تیار رہنا چاہیدا، حکومت اپنی نااہلی دا ملبہ شہباز شریف اُتے نہ پائے۔ اوہناں نے آکھیا کہ تحریک انصاف دی حکومت ایس بدترین انتقام دی ذمے وار اے۔
اوہناں نے آکھیا کہ حکومت اپنے سیاسی مخالفاں نال جِداں دا سلوک کر رہی اوسے طرحاں دا سلوک کل نوں اوہناں نوں وی ہوئے گا۔ ایس توں وکھ پارٹی صدر دی گرفتاری اُتے مسلم لیگ (ن) کوئی وی وڈا احتجاج ریکارڈ کروان وچ ناکام رہی اے۔ شہباز شریف دی گرفتاری مگروں ای ارکان اسمبلی نوں اپنے اپنے علاقیاں وچ احتجاج کرن دا ٹاسک دتا گیا سی پر کیتے وی پارٹی صدر دی گرفتاری اُتے وڈا احتجاج ویکھن نوں نہیں ملیا۔ شہباز شریف دی گرفتاری مگروں وڈا احتجاج نہ ہون اُتے اوہناں دے پُتر حمزہ شہباز نے پارٹی رہنماواں اُتے خفگی دا اظہار کیتا۔
