اسلام آباد(پاکستان پوائنٹ نیوز20۔ستمبر۔2018ء) 3مہینیاں توں پہلاں سعودی عرب دا دورہ کیوں کیتا؟وزیر اعظم نے وجہ دس دتی۔ تفصیل مطابق تحریک انصاف دی حکومت بنن مگروں اعلان کیتا گیا سی کہ وزیر اعظم عمران خان تن مہینیاں تیکر کسے ملک دا دورہ نہیں کرن گے۔ پر عمران خان نے تن مہینے پورے ہون توں پہلاں ای سعودی عرب دا دورہ کیتا جو 2دناں دا سی۔ سعودی ٹی وی نوں انٹرویو دیندے ہوئے عمران خان دا کہناسی کہ کئی بحراناں دی وجہ توں تن مہینیاں تیکر ملکوں باہر نہیں جانا سی تاکہ پہلوں اپنے گھر نوں ٹھیک کرئیے پر سعودی عرب دا دورہ ایس لئی کیتا کہ شاہ سلمان نے دعوت دتی سی تے ایس لئی وی کہ بحیثیت مسلمان مکہ تے مدینہ جانا چاہیدا ۔
وزیراعظم عمران خان نے ہور آکھیا اے پاکستان نوں جدوں وی لوڑ پئی تے سعودی عرب نے مدد کیتی ، دوناں ملکاں دے آپس وچ ڈونگھے تعلقات نیں۔ العربیہ نیوز چینل نوں انٹرویو دیندے ہوئے وزیر اعظم عمران خان نے آکھیا کہ پاکستانی لوکائی سعودی عرب دی لوکائی دا احترام کردی اے۔ حقیقت وچ ایہدی وڈی وجہ مکہ مکرمہ تے مدینہ نال پاکستانی لوکائی دا جذباتی لگاؤ اے۔ وزیراعظم نے آکھیا کہ پاکستان نے ہمیشہ سعودی حکومت دی حمایت کیتی پر اسیں ایہو محسوس کردے آں کہ مسلم دنیا وچ کسے قسم دے جھیڑے نہیں ہونے چاہیدے۔ ایہ جھیڑے سانوں ساریاں نوں کمزور کر رہے نیں۔
