لاہور(پاکستان پوائنٹ نیوز20۔ستمبر۔2018ء) پچھلے دیہاڑے اسلام آباد ہائی کورٹ نے سابق وزیر اعظم نواز شریف، اوہناں دی دھی مریم نواز تے داماد کیپٹن (ر)صفدر دی سز ا معطل کردے ہوئے اوہناں نوں رہا کرن دا حکم جاری کیتا سی۔ عدالت نے ایس موقعے تے نواز شریف، مریم نواز تے کیپٹن (ر) صفدر نوں 5,5لکھ رُپئے دے ضمانتی مچلکے وی جمع کروان دا حکم دتاسی۔ جیہدے مگروں کوئی رات دے 8وجے میاں نواز شریف، مریم نواز تے کیپٹن (ر) صفدر اڈیالا جیل توں جہاز راہیں لاہور ائر پورٹ اپڑے جتھے کارکناں نے اوہناں دا چاہواں نال استقبال کیتا۔
جیہدے بعد نواز شریف، مریم نواز تے کیپٹن (ر) صفدر جاتی امرا چلے گئے سن۔نواز شریف دی رہائی تے اوہناں دی آؤندی حکمت عملی بارے گل بات کردے ہوئے سینئر پرچاکار ڈاکٹر دانش نے آکھیا کہ اطلاعواں آرہیاں نیں کہ آصف علی زرداری علاج لئی ملکوں باہر لندن چلے جان گے جتھے اوہ اپنا علاج کروان گے جدکہ پارٹی دے سارے فیصلے بلاول بھٹو زرداری کرن گے۔ دوجے پاسے نواز شریف بارے وی آکھیا جا رہیا اے کہ اوہ ایسے مہینے دے آخیر وچ ملکوں باہر چلے جان گے۔ ڈاکٹر دانش نے آکھیا کہ انج دیاں اطلاعواں آ رہیاں نیں، پر اپیل دا فیصلا آن تیکر کُجھ نہیں آکھیا جا سکدا۔
