اسلام آباد(پاکستان پوائنٹ نیوز19۔ستمبر۔2018ء) پاکستان مسلم لیگ (ن) دے رہنما و سابق گورنر سندھ محمد زبیر نے آکھیا اے کہ شریف خاندان دی رہائی دا سو فیصدیقین سی۔ عدالت دا احترام کردے آں تے صحیح فیصلا ہویا اے جیہدے اُتے رب دا شکر ادا کردے آں۔ سابق وزیر اعظم نواز شریف، مریم نواز تے کیپٹن (ر) صفدر دی رہائی بارے اپنے اک بیان وچ مسلم لیگ (ن) دے رہنما محمد زبیر نے آکھیا کہ دیر نال ای سہی پر فیصلا ساڈے حق وچ آیا، ساریاں عدالتاں وچ آکھیا گیا کہ پاکستان وچ بال عام طور اُتے ماں پیو اُتے انحصار کردے نیں، ایس حوالے نال ساڈا کیس مضبوط سی جے میاں صاحب ای قصور وار نہیں تے اوہناں دی دھی تے اوہناں دے داماد کیویں قصور وار ہو گئے نیں۔
اوہناں دا کہنا سی کہ سانوں 100فیصد ایسے فیصلے دی آس سی، کیس وچ کُجھ ساہ ست ای نہیں۔ نجی ٹی وی مطابق اوہناں نے آکھیا کہ اطہر من اللہ بہت زبردست جج نیں۔ اطہر اوہ جج نیں جو افتخار چودھری دے ترجمان سن۔ عدالت دا احترام کردے آں تے صحیح فیصلا ہویا اے جیہدے اُتے رب دا شکر ادا کردے آں۔
