اسلام آباد(پاکستان پوائنٹ نیوز19۔ستمبر۔2018ء) سیاست دا میدان ہوئے یاں کرکٹ دا ، بھارت پاکستان لئی ہمیشہ ای اپنی روایتی ہٹ دھرمی وکھاندا اے۔ کُجھ مہینے پہلاں ای پاکستان نے ملک بھر وچ پانی دی کمی اُتے قابو پان لئی ڈیمز بنان دا اعلان کیتا تے ایس اعلان نے بھارت دیاں نینداں حرام کر دتیاں نیں۔ بھارت نے پاکستان دشمنی وچ ساریاں حداں پار کردے ہوئے بھاشا ڈیم دی اُساری خلاف یو این او وچ درخاست دین دیاں تیاریاں کر لیاں نیں۔
میڈیا رپورٹ مطابق بھارت نے یو این او وچ بھاشا ڈیم دی اُساری خلاف جو درخاست دین دیاں تیاریاں کر لیاں نیں اوہدے وچ موقف اختیار کیتا جائے گا کہ ڈیم متاثرین نے بھارت نال رابطہ کیتا اے کہ ڈیم بنن نال اوہناں دا نقصان ہوئے گا ایس لئی ڈیم نوں رکوان وچ ساڈی مدد کیتی جائے۔ وسیلیاں دا کہنا ا ے کہ بھاشا ڈیم خلاف یو این او وچ درخاست دین دے حوالے نال بھارت دا ہوم ورک ہو گیا اے۔
پاکستان اندر موجود کیہڑیاں کیہڑیاں طاقتاں دی سپورٹ حاصل کرنی اے ، کیہڑیاں کیہڑیاں سیاسی علاقائی جماعتاں دے ورکرز ایس ڈیم خلاف باہر نکلن گے تے کس طریقے نال اوہنوں جھیڑوا (متنازعہ) بنایا جائے ،ایس بارے بھارت نے کم شروع کیتا ہویا اے۔ وسیلیاں دا کہنا اے کہ ایس معاملے اُتے بھارتی ٹیم نے سفارتی پدھر اُتے وی کم شروع کیتا ہویا اے تے پاکستان خلاف ہور ملکاں نوں ایہدے اُتے اعتماد وچ لے کے عالمی پریشر بنان دا عمل وی شروع کر دتا گیا اے۔ دوجے پاسے پاکستان نے وی سفارتی پدھر اُتے ایس سازش نال نبڑن لئی تیاری شروع کر دتی اے۔ سیاسی مبصرین تے دفاعی تجزیہ کاراں مطابق بھارت کدی وی پاکستان نوں ترقی تے اپنے مسائل نوں حل کردے ہوئے نہیں ویکھ سکدا۔
