لاہور(پاکستان پوائنٹ نیوز19۔ستمبر۔2018ء) پاکستان عوامی تحریک دے سربراہ ڈاکٹر طاہر القادری نے آکھیا اے کہ عمران خان لئی ماڈل ٹاؤن دُکھانت پہلا امتحان اے، ماڈل ٹاؤن دے اک وی قاتل نوں سزا نہیں ملی، 14قتل کیتے گئے۔ بدھ نوں پاکستان عوامی تحریک دے سربراہ ڈاکٹر طاہر القادری استنبول توں لاہور اپڑے۔ ائر پورٹ اُتے میڈیا نال گل بات کردے ہوئے اوہناں نواز شریف دی بیگم کلثوم نواز دی وفات اُتے ہرکھ دا وکھالا تے اوہناں لئی مغفرت دی دعا وی کیتی۔
اک سوال دے جواب وچ ڈاکٹر طاہر القادری نے آکھیا کہ ماڈل ٹاؤن دُکھانت دے اک وی قاتل نوں سزا نہیں ملی، 14قتل کیتے گئے، ایس قوم دیاں دھیاں نوں گھسیٹیا تے شہید کیتا گیا، خون دریا وانگ وگایا گیا۔ اوہناں نے آکھیا کہ چار سال توں مظلوم دھکے کھا رہے نیں۔ آواز وی چُک رہے نیں ایس لئی ہن پی ٹی آئی دی حکومت ماڈل ٹاؤن دُکھانت دے شہیداں نوں انصاف دوائے۔
سربراہ عوامی تحریک نے آکھیا کہ ساڈے نال عمران خان نے پچھلے چار ورھیاں وچ شہیداں نوں انصاف دوان لئی آواز چکی تے پولیس افسراں دی برطرفی دی منگ کیتی پر ہن پی ٹی آئی حکومت لئی پہلا امتحان اے کہ اوہ اوہناں 116پولیس افسراں جو انصاف دی راہ وچ رکاوٹ نیں ، جیہناں نے ساڈے گواہواں نوں ماریا کُٹیا تے دھمکیاں وی دتیاں جدکہ دھمکیاں دے نتیجے وچ ساڈے وکیل نے وی کیس لڑن توں معذرت کر لی۔ ایس لئی منگ کرنے آں کہ اوہناں نوں عہدیاں توں ہٹا کے گھر گھلیا جائے۔ طاہر القادری نے منگ کیتی کہ شہباز شریف تے رانا ثناا للہ نوں جیل گھلیا جائے کیونکہ ہن حکومت قاتلاں دی نہیں بلکہ انصاف دوان والیاں دی اے۔
