سیالکوٹ(پاکستان پوائنٹ نیوز15۔ستمبر۔2018ء) پنجاب پولیس پہلے ای ناقداں دے نشانے اُتے اے ، پنجاب پولیس اُتے فرض نبھان وچ کوتاہی ورتن تے رشوتاں لین ورگے الزام لگدے رہندے نیں۔ کُجھ حد تیکر پنجاب پولیس نے اپنے بارے ایہ تاثر ختم کرن دی کوشش وی کیتی پر کُجھ دن پہلاں سیالکوٹ وچ اک نجی محفل وچ بنائی گئی ویڈیو عام آ گئی اے جیہنے اک وار فیر توپاں دا پاسا پولیس ول موڑ دتا۔
تفصیل مطابق سوشل میڈیا اُتے اک وردی وچ پولیس اہلکار دی نجی محفل وچ نچن دی ویڈیو وائرل ہو گئی۔ ویڈیو وچ ویکھیا گیا کہ مبینہ طور اُتے نشے وچ دھت پولیس اہلکار نے نہ صرف ڈانسر کُڑی نال ڈانس کیتا بلکہ اوہدے اُتے نوٹ وی سُٹے۔ میڈیا رپورٹس مطابق مبینہ طور اُتے ایہ سیالکوٹ پولیس دے اہلکار نیں جیہناں نے سیالکوٹ وچ ہون والی اک نجی محفل وچ ڈانسر کُڑی نال نہ صرف ڈانس کیتا بلکہ اوہدے اُتے نوٹ وی سُٹے۔
میڈیا رپورٹ وچ دسیا گیا کہ ویڈیو وچ نظر آن والے پولیس اہلکار دا تعلق تھانا مراد پور توں اے ۔ دوجے پاسے پولیس وسیلیاں نے ویڈیو وچ موجود بندے دے پولیس اہلکار ہون دیاں خبراں نوں رد کر دتا اے۔پولیس وسیلیاں دا آکھنا اے کہ ایہ بندہ تھانا مراد پور توں کیہ سیالکوٹ دے کسے تھانے دا اہلکار نہیں اے۔
