لاہور(پاکستان پوائنٹ نیوز15۔ستمبر۔2018ء) پی آئی اے دی لندن جان والی اُڈان وچ کپتان تے سٹیورڈ وچکار جھیڑا ہوگیا، جھیڑے دی وجہ توں اُڈان تن گھنٹے لیٹ، مسافر جہاز وچ بیٹھے احتجاج کردے رہے۔ دسیا گیا اے کہ پی آئی اے دی لندن جان والی اُڈان پی کے 757دے کپتان انوار چودھری نے سٹیورڈ اویس قریشی نوں جہاز وچ سوار کرن توں انکار کردے ہوئے آکھیا کہ سٹیورڈ لندن اُڈان سمگلنگ کیس وچ ملوث رہیا تے سمگلنگ دے واقعیاں کارن باقی لوکاں نوں وی اوکڑاں دا ساہمنا کرنا پیندا اے۔
سٹیورڈ نوں سوار کرن دے اعتراض اُتے جہاز دے باقی کریو نے وی جان توں انکار کر دتا۔ جہاز دے عملے دے جھیڑے کارن اُڈان لیٹ ہوئی، جیہدے اُتے جہاز وچ سوار مسافراں نے احتجاج کیتا۔ بعدوں وڈے افسراں نے صلح صفائی کروائی تے جہاز نے اُڈان بھری۔
