اسلام آباد(پاکستان پوائنٹ نیوز10۔ستمبر۔2018ء) چینی وزارت خارجا نے سی پیک دے حوالے نال وضاحتی بیان جاری کر دتا اے۔ چین دا کہنا اے کہ سی پیک اُتے پاکستان تے چین دا موقف اک اے۔ دوویں ملک سی پیک دی چھیتی تکمیل لئی پرعزم نیں۔ میڈیا رپورٹس مطابق چینی وزارت خارجا نے وضاحت کیتی اے کہ سی پیک اُتے پاکستان تے چین دا موقف اک اے۔ دوویں ملک سارے شعبیاں وچ پکے تعلقات دا ارادہ رکھدے نیں۔
پاکستان تے چین دی سی پیک چھیتی مکمل کرن اُتے سانجھ اے۔ چینی ترجمان دا کہنا اے کہ بیجنگ اسلام آباد دی حمایت جاری رکھے گا۔ اوہناں نے دسیا کہ چینی وزیر خارجا دا دورہ پاکستان اصل وچ پرانی دوستی دا نتیجہ اے۔ یاد رہوے کہ سی پیک بارے پروپیگنڈا کیتا جا رہیا سی۔ برطانیہ دے مشہور اقتصادی رسالے فنانشل ٹائمز نے اپنی رپورٹ وچ دعوا کیتا سی کہ پاکستان دی نویں حکومت چین نال سی پیک سمجھوتے اُتے نظرثانی بارے غور کر رہی اے۔
رپورٹ وچ آکھیا گیا سی کہ چینی وزیر خارجا وانگ ژی نے اپنے پاکستانی دورے دوران پاکستان وچ سی پیک سمجھوتے اُتے دوبارہ مذاکرات دے حوالے نال اشارہ دتا اے۔ دوویں ملکاں وچکار منصوبیاں اُتے قرضے دین دی مدت ودھان دے آپشن غور ہیٹھ نیں۔ ایس حوالے نال معاشیات دے ماہر و وزیر اعظم عمران خان دے مشیر برائے صنعت و تجارت عبدالرزاق دا کہنا اے کہ اجے سارے سی پیک منصوبے اُتے اک سال لئی عمل روک دینا چاہیدا۔ اوہناں نے آکھیا کہ ایسے سمجھوتے نویں سرے توں کیتے جان گے جیہدے نال چینی کمپنیاں نوں ناجائز فائدہ ہو رہیا اے تے پاکستانی کمپنیاں نقصان وچ نیں۔
