کراچی(پاکستان پوائنٹ نیوز10۔ستمبر۔2018ء) سٹیٹ بنک آف پاکستان نے واضح کیتا اے کہ 5ہزار والا نوٹ نہیں بدلیا جا رہیا ، نوٹاں دی بدلی دیاں افواہواں سچ نہیں، لوکائی انج دیاں افواہواں ول توجہ نہ دیوے، سٹیٹ بنک انج دے سارے اعلان اپنی ویب سائٹ اُتے کردا اے۔ میڈیا رپورٹس مطابق ترجمان سٹیٹ بنک نے پنج ہزار رُپئے والے کرنسی نوٹ نوں بدلن دیاں افواہواں نوں رد کر دتا اے۔
ترجمان نے اپنے وضاحتی بیان وچ دسیا کہ 5ہزار رُپئے والے نوٹ دی بدلی دیاں افواہواں غلط نیں۔ سٹیٹ بنک نے پنج ہزار رُپئے والا نوٹ بند کرن یاں منسوخی دی سفارش نہیں کیتی۔ ترجمان دا ہور کہنا سی کہ کسے وی نوٹ دی منسوخی لئی سٹیٹ بنک پیشگی اعلان کردا اے۔ سٹیٹ بنک انج دے سارے اعلان اپنی ویب سائٹ اُتے کردا اے تے سرکلر جاری کردا اے۔ ترجمان نے آکھیا کہ لوکائی 5ہزار دے نوٹ دی تبدیلی دیاں افواہواں ول توجہ نہ دیوے۔
ایس توں پہلاں 27اگست نوں پارلیمنٹ ہاؤس دے باہر میڈیا نال گل بات کردے ہوئے وفاقی وزیر خزانہ اسد عمر کولوں پرچا کار نے نویں کرنسی نوٹاں بارے سوال کیتا، جیہدے اُتے اسد عمر نے آکھیا کہ نویں کرنسی نوٹاں بارے جو خبر چل رہی اے اوہ میرے علم وچ نہیں اے۔ کرنسی نوٹاں دی تبدیلی بارے انج دی کوئی خبر میرے تیکر نہیں اپڑی ۔اوہناں دا کہنا سی کہ ایہ جو میں وٹس ایپ گروپاں تے سوشل میڈیا اُتے ویکھنا واں اُنجدا کُجھ وی نہیں اے۔ اسد عمر نے ہور آکھیا کہ جعلی نوٹ جس رنگ وچ وی ملن چنگے لگدے نیں۔
