لاہور(پاکستان پوائنٹ نیوز08۔ستمبر۔2018ء) وزیر اعلا پنجاب سردار عثمان بزدار دی صدارت ہیٹھ پنجاب کابینہ دا اجلاس ہویا۔ اجلاس وچ وزیر اعلا پنجاب عثمان بزدار دا اک ہور وڈا فیصلا ساہمنے آیا۔ وزیر اعلا پنجاب سردار عثمان بزدار نے سرکاری اداریاں توں چٹ سسٹم ختم کرن دا فیصلا کر لیا۔ تفصیل مطابق پنجاب بھر دے سارے سرکاری اداریاں توں وزیر اعلا پنجاب نے چٹ سسٹم ختم کرن دا اعلان کر دتا۔
وزیر اعلا پنجاب نے آکھیا کہ سرکاری اداریاں وچ ہن کسے سرکاری افسر نال ملن لئی چٹ سسٹم نہیں ہوئے گا۔ سائل سرکاری دفتر وچ جائے بوہا کھولے تے افسر دے کمرے وچ چلا جائے۔ اوہناں نے آکھیا کہ ہر سرکاری دفتر لوکائی لئی کُھلا رہوے گا۔ ہن کسے سائل نوں چٹ گھل کے افسر نال ملن دا انتظار نہیں کرنا پئے گا۔ وزیر اعلا پنجاب نے ہدایت کیتی کہ بیورو کریسی نال ملن لئی کوئی اوکڑ نہیں ہونی چاہیدی۔ ایس حوالے نال سرکاری اداریاں وچ موجود سیکرٹریز، آئی جیز تے پولیس افسراں نوں وی ہدایتاں جاری کر دتیاں گئیاں نیں۔ وزیر اعلا پنجاب دے کابینہ اجلاس وچ کیتے گئے ایس فیصلے مگروں لوکائی دے مسائل حل کرن وچ اوکڑاں دا ساہمنا نہیں کرنا پئے ہوئے گا۔
