اسلام آباد(پاکستان پوائنٹ نیوز08۔ستمبر۔2018ء) ڈیمز فنڈز لئی وزیر اعظم عمران خان دی اپیل مگروں اوورسیز پاکستان نے وی کپتان دی کال اُتے لبیک آکھ دتا اے۔ پچھلے دیہاڑے عمران خان دی ڈیمز فنڈ وچ پیسے جمع کروان دی اپیل مگروں ڈیمز فنڈ وچ لگاتار وادھا ہو رہیا اے۔ پر ہن پاکستان کمیونٹی لندن دے چیئرمین نے ایس معاملے اُتے شاندار اعلان کردے ہوئے آکھیا کہ اسیں اینے فنڈز جمع کراواں گے کہ پاکستان وچ اک نہیں کئی ڈیمز بن سکن گے۔
تفصیل مطابق نجی ٹی وی چینل نال گل بات کردے ہوئے چیئرمین پاکستان کمیونٹی سینٹر لندن کونسلر طارق ڈار نے آکھیا کہ اوورسیز پاکستانی اینا فنڈ دین گے کہ اک دو نہیں بلکہ کئی ڈیم بنائے جا سکن گے۔ اوہناں نے آکھیا کہ باہرلے ملک وسدے پاکستانی وزیر اعظم عمران خان دی اپیل اُتے ودھ چڑھ کے ڈیم وچ حصہ پان گے۔ امریکا وچ وسدے پاکستانی کیمونٹی رہنما ڈاکٹر فرحت صدیقی نے وی ایس حوالے نال دتے گئے اک بیان وچ آکھیا کہ اوورسیز پاکستانی ملک دی خدمت لئی ہر ویلے تیار رہن، ڈیم لئی فنڈ ریزنگ مہم کامیاب رہوے گی۔
یاد رہوے پچھلے دیہاڑے وزیراعظم عمران خان نے وزارت عظمی دا عہدہ سنبھالن مگروں قوم نال اپنا دوجا خطاب کیتا۔ اپنے خطاب دوران اوہناں نے قوم توں ڈیم فنڈ وچ حصہ پان دی اپیل کیتی ۔اوہناں دا کہنا سی کہ ملک وچ ڈیم بنانا ضروری ہو گیا۔ ڈیم نہ بنایا تے ماہرین مطابق 2025وچ خشک سالی شروع ہو جائے گی۔ باہرلے ملک موجود پاکستانی ڈیم فنڈ وچ حصہ پان، میں اوہناں دے پیسیاں دی حفاظت کراں گا۔
عمران خان دا کہناسی کہ سبھ توں وڈا پانی دا مسئلا اے۔ جدوں پاکستان آزاد ہویا تے ہر پاکستانی دے حصے آن والا پانی پنج ہزار چھ سو کیوبک میٹر سی جو اج صرف اک ہزار کیوبک میٹر اے۔ عمران خان دا کہنا سی کہ ساڈے کول پانی جمع دی کاپیسٹی صرف 30دن اے۔ ایس لئی ڈیم بنانا بہت ضروری اے۔ جے انج نہ کیتا تے آن والیاں نسلاں لئی بہت مسئلے پیدا ہون گے۔ ایکسپرٹ ایہ آکھدے نیں کہ 2025و چ خشک سالی شروع ہو جائے گی۔
ساڈے ایتھے قحط پے سکدا اے۔ اسیں چیف جسٹس نوں داد دینے آں اوہناں ایہ کم شروع کیتا۔ ایہ کم ساڈے سیاست داناں داسی۔ اوہناں نوں سوچنا چاہیدا سی کہ ایہ کم کردے۔ اسیں چیف جسٹس تے پرائم منسٹر فنڈ نوں اکٹھا کراں گے۔ میں اپیل کرنا واں کہ سارے اپنے مستقبل لئی ایس ڈیم دے فنڈ نوں پیسا دینا شروع کرن۔ خاص طور اُتے اوہ لوک جیہناں نے میری شوکت خانم تے نمل یونیورسٹی بنان وچ مدد کیتی۔
