لاہور(پاکستان پوائنٹ نیوز28۔اگست۔2018ء) اج وزیر اعلا پنجاب سردار عثمان بزدار نے میاں چنوں دے ہسپتال دا دورہ کیتا ۔ اوہناں دے دورے بارے خبر آئی کہ وزیر اعلا دے پروٹوکول دی وجہ توں اک بالڑی دی جان چلی گئی ۔ پر ہن اک ویڈیو ساہمنے آئی اے ، ویڈیو وچ ویکھیا جا سکدا اے کہ وزیر اعلا پنجاب جدوں ہسپتال وچ روگیاں توں اوہناں دے مسئلے پُچھ رہے سن تے ہلاک ہون والی بالڑی تے اوہدی ماں موجود سی۔جیہدی وضاحت پاکستان تحریک انصاف ولوں وی دتی گئی اے تے آکھیا گیا اے کہ کُجھ میڈیا چینلز ولوں غلط خبراں چلائیاں جا رہیاں نیں۔ خبراں چلائیاں گئیاں کہ بالڑی نوں وزیر اعلا پنجاب دے پروٹوکول دی وجہ توں ایمرجنسی وچ داخل کروان دی اجازت نہیں دتی گئی تے ایس صورتحال وچ بالڑی دم دے گئی۔ جدکہ تصویراں وچ ویکھیا جا سکدا اے کہ اوہی سوانی اپنی بالڑی نال بیڈ اُتے موجود اے۔ایس بارے ڈاکٹراں دا کہنا اے کہ بالڑی نوں جدوں ہسپتال لیاندا گیا تے اوہدی حالت خطرے وچ سی۔ ایس موقعے تے بالڑی دے وارث مطمئن سن تے جاندے سن کہ بالڑی دی حالت ٹھیک نہیں پر بالڑی نوں 15منٹ تیکر ایمرجنسی وچ رکھیا گیا تے دوائیاں وی دتیاں گئیاں۔ پر بالڑی ہلاک ہوگئی۔ ایس بارے کئی میڈیا رپورٹس مطابق جدوں وزیر اعلا پنجاب ہسپتال اپڑے تے ڈاکٹر بالڑی نوں چیک کرن دی بجائے وزیر اعلا پنجاب نوں پروٹوکول دین وچ مست ہو گئے۔ بالڑی دی موت مگروں اوہدے ماں پیو نے ڈاڈھا احتجاج وی کیتا۔یاد رہوے کہ اج وزیر اعلا پنجاب عثمان بزدار نے میاں چنوں دے تحصیل ہیڈ کوارٹر ہسپتال دا دورہ کیتا۔ ہسپتال دے دورے دوران نویں پاکستان دے وزیر اعلا نال پرانے پاکستان والا ای پروٹوکول سی۔ وزیر اعلا پنجاب اُچیچے جہاز اُتے میاں چنوں گئے جیہدے مگروں تحصیل ہیڈ کوارٹر جان لئی پنجاب دے وزیر اعلا عثمان بزدار نال 15توں ودھ گڈیاں دا قافلا وی آیا۔ ہسپتال اپڑن اُتے وزیر اعلا پنجاب سردار عثمان بزدار نے کئی وارڈاں دا دورہ وی کیتا۔ 15توں ودھ گڈیاں دا پروٹوکول لین اُتے وزیر اعلا پنجاب عثمان بزدار نوں لوکائی ولوں تنقید دا ساہمنا اے۔
