کراچی(پاکستان پوائنٹ نیوز28۔اگست۔2018ء) اُنج تے ٹریفک پولیس اہلکاراں نوں رشوت خور آکھ کے کئی وار تنقید دا نشانہ بنایا جاندا اے۔ پر کراچی دے اک ٹریفک اہلکار نے ایمانداری دی وڈی مثال قائم کر کے سارے ناقداں دا مونہ بند کروا دتا اے۔ ٹریفک پولیس اہلکار نے نہ صرف سڑک اُتے بے ہوش پئے شہری نوں ہسپتال پہنچایابلکہ اوس شہری کولوں ملن والے 47ہزار رُپئے وی واپس کر دتے۔
میڈیا نال گل بات کردے ہوئے حکم داد نے آکھیا کہ کسے نے بے ہوش ہون والے شہری نوں مٹھیائی کھوائی سی، جیہدے وچ نشہ سی۔شہری نے مینوں دسیا کہ مٹھیائی کھان دے ادھے گھنٹے مگروں ای میں بے ہوش ہو گیا سی۔ میں بے ہوشی دی حالت وچ شہری نوں ہسپتال منتقل کیتا۔ ہسپتال وچ ڈاکٹراں نے اوہدیاں جیباں دی تلاشی لئی تے اوہدی جیب وچوں اک پرس برآمد ہویا جیہدے وچ 47ہزار رُپئے سن۔دوجے پاسے ٹریفک پولیس اہلکار حکم داد دی ایمانداری دی ایہ کہانی وڈے افسراں تیکر اپڑی تے اوہ وی حکم داد دی تعریف کیتے بنا نہ رہ سکے ۔
