لاہور(پاکستان پوائنٹ نیوز27۔اگست۔2018ء) آئی جی پولیس پنجاب نے ڈی پی او پاکپتن نوں ٹرانسفر کرن اُتے وضاحت پیش کر دتی۔ اوہناں نے آکھیا کہ شہری نال اہلکاراں دی بدتمیزی اُتے ڈی پی او نے غلط بیانی توں کم لیا، ٹرانسفر تے غلط رنگ دین اُتے ڈی پی او خلاف انکوائری دا حکم دے دتاگیا۔ تفصیل مطابق آئی جی پنجاب پولیس نے وضاحت دتی کہ اے ڈی پی او نوں کسے دباء اُتے نہیں بلکہ غلط بیانی اُتے تبدیل کیتا گیا۔
شہری نال اہلکاراں دی بدتمیزی اُتے ڈی پی او نے غلط بیانی توں کم لیا۔ ٹرانسفر نوں غلط رنگ دین اُتے ڈی پی او خلاف انکوائری دا حکم دے دتاگیا۔ اوہناں نے آکھیا کہ ٹرانسفر آرڈر نوں غلط رنگ دین تے ٹرانسفر آرڈر نوں سوشل میڈیا اُتے وائرل کرن پاروں سابق ڈی پی او پاکپتن رضوان گوندل خلاف انکوائری دا حکم دے دتا اے۔ اوہناں نے آکھیا کہ بطور پولیس افسر غیر ذمے وارانہ رویے تے غلط بیانی اُتے رضوان گوندل نوں بدلیا گیا۔
مس کنڈکٹ تے سینئرز نوں مس گائید کرن والے افسراں تے اہلکار رعایت دے حق دار نہیں نیں۔چیتے رہوے کہ میڈیا رپورٹس وچ دسیا گیا سی کہ خاتون اول بشری بی بی دے سابق شوہر خاور مانیکا دا حکم نہ منن والے ڈی پی او نوں معطل کر دتا گیا اے۔ پولیس وسیلیاں مطابق پولیس نے 23اگست نوں خاور مانیکا نوں ناکے اُتے روکیا پر اوہ نہ رُکے۔خاور مانیکا ولوں ایس موقعے تے گندی زبان ورتی گئی۔وسیلیاں مطابق ڈ ی پی او رضوان نوں خاور مانیکا دے ڈیرے اُتے جا کے معافی منگن دا حکم دتا گیا۔ ڈی پی او رضوان نے ایہ آکھ کے معافی منگن توں انکار کر دتا کہ پولیس دا کوئی قصور نہیں ۔ ڈی پی او رضوان گوندل نے وزیر اعلا پنجاب نوں خاور مانیکا توں معافی منگن توں انکار دے موقف بارے دس دتا اے۔
