اسلام آباد(پاکستان پوائنٹ نیوز27۔اگست۔2018ء) پاکستان تحریک انصاف نے صدارتی الیکشن توں پہلاں اک ہور وڈی کامیابی حاصل کیتی اے۔سینیٹر ہدایت اللہ نے پاکستان تحریک انصاف وچ رلتی ہون دا اعلان کر دتا اے۔ تفصیل مطابق پاکستان تحریک انصاف نے 2018دے الیکشن وچ کامیابی مگروں حکومت بنا لی اے پر ہن پاکستان تحریک انصاف دی حکومت نوں سبھ توں وڈا چیلنج صدارتی الیکشن دا اے کیونکہ صدر پاکستان جے تحریک انصاف یاں او ہدیاں اتحادی جماعتاں توں نہ ہویا تے تحریک انصاف نوں حکومت لئی وڈی پریشانی دا ساہمنا کرنا پے سکدا اے تے سبھ توں وڈی پریشانی ایہ ہو سکدی اے کہ ہر قانون بنان لئی حکومت نوں صدر پاکستان ول ویکھنا پئے گا۔
ایہو وجہ اے کہ ہن صدارتی الیکشن اُتے تحریک انصاف نے اکھاں رکھ لیاں نیں تے اوہدے لئی سیاسی جوڑ توڑ شروع کر دتا گیا اے۔ ایس حوالے نال سینیٹر و ارکان اسمبلی دے اک اک رکن دی حمایت بہت اہم اے۔ پر صدارتی الیکشن توں پہلاں تحریک انصاف نوں وڈی کامیابی مل گئی اے۔ فاٹا توں اک ہور آزاد سینیٹر نے پاکستان تحریک انصاف وچ رلتی ہون دا اعلان کر دتااے۔
سینیٹر ہدایت اللہ نے وزیر اعظم عمران خان نال ملاقات کیتی تے اوہناں دی قیادت اُتے اعتماد دا اظہار کیتا۔ ایس موقعے تے وزیر اعظم عمران خان نے سینیٹر ہدایت اللہ نوں جی آیاں آکھیا۔ یاد رہوے کہ ایس توں پہلاں وی تن سینیٹرز نے پاکستان تحریک انصاف وچ رلتی ہون دا اعلان کیتا سی۔ تحریک انصاف وچ رلتی ہو ن و الے سینیٹرز وچ مومن آفریدی، سجاد طورو تے اورنگزیب خان شامل سن۔
