اسلام آباد(پاکستان پوائنٹ نیوز14۔اگست۔2018ء) پچھلے دیہاڑے قومی اسمبلی دا اجلاس ہویا ۔ اجلاس وچ نویں ارکان قومی اسمبلی نے حلف چُکیا۔ قومی اسمبلی دے اجلاس وچ رلت لئی بلاول بھٹو زرداری تے آصف علی زرداری وی اپڑے تے بطور ممبر قومی اسمبلی حلف چُکیا۔ ایس بارے گل بات کردے ہوئے مشہور پرچا کار رؤف کلاسرادا کہنا سی کہ مینوں آصف علی زرداری قومی اسمبلی وچ کُجھ بیمار لگے۔
اوہ پہلے والے زرداری لگ ای نہیں رہے سن بلکہ مینوں تے لگا کہ آصف علی زرداری نوں کسے سہارے دی ضرورت سی جو اوہناں نوں پھڑ کے سٹیج تیکر لے جائے تے اوہ دستخط کرن۔ اوہ صرف بلاول بھٹو اُتے نظر رکھن لئی قومی اسمبلی آئے سن۔ رؤف کلاسردا دا ہور کہنا سی کہ آصف علی زرداری اوہ پہلے ابا جی نیں جو اپنے پُتر دی شہرت توں خوفزدہ نیں یاں فیر حسد کردے نیں۔
حالانکہ پیو نوں تے خش ہونا چاہیدا کہ میرا پُتر اینا اگانہ ودھ گیا اے۔اوہناں دا کہنا سی کہ پنجاب وچ بلاول بھٹو دی وجہ توں ای پیپلز پارٹی نوں کُجھ ووٹ ملے۔دوجے پاسے پچھلے دیہاڑے بلاول بھٹو دے پہلی وار اسمبلی وچ جان تے حلف چُکن اُتے اوہناں دیاں بھیناں بہت خش وکھالی دتیاں۔ جیہدا وکھالا(اظہار) اوہناں نے اپنے ٹویٹر پیغام وچ وی کیتاسی۔ آصفہ بھٹو دا ا پنے ٹویٹر پیغام وچ کہنا سی کہ بلاول بھٹو تے اپنے والد آصف علی زرداری نوں قومی اسمبلی وچ حلف چُکدا ویکھ کے میں بہت خش آں تے ایہ خوشی بیان کرن لئی میرے کول اکھر نہیں نیں۔دوجے پاسے بختاور بھٹو نے وی ایس بارے ٹویٹ کردے ہوئے آکھیا سی کہ مینوں فخر اے کہ آصف علی زرداری پارلیمنٹ وچ حلف چُکن والے پہلے ممبر نیں۔
