لاہور(پاکستان پوائنٹ نیوز14۔اگست۔2018ء) جمعیت علمائے اسلام (ف) دے سربراہ مولانا فضل الرحمان نے آزادی دیہاڑ نہ منان دا اعلان کیتا سی جیہدے اُتے اوہناں نوں ڈاڈھی تنقید دا ساہمنا کرنا پیا۔ اپوزیشن اتحاد وچ ہون دی وجہ توں پاکستان مسلم لیگ (ن) دے صدر شہباز شریف نے مولانا فضل الرحمان دے موقف دی تائید کیتی پر اج پاکستان مسلم لیگ (ن) دے صدر شہباز شریف نے پارٹی سیکرٹریٹ وچ آزادی دیہاڑ دے حوالے نال منعقد کیتی جان والی اک تقریب وچ پرچم کشائی کیتی۔ پاکستان دے 71ویں آزادی دیہاڑ دے موقعے تے پاکستان مسلم لیگ (ن) دے پارٹی سیکرٹریٹ وچ پرچم کشائی دی تقریب د اآہرکیتا گیا ۔ تقریب وچ شہباز شریف نے وی رلت کیتی تے پرچم کشائی کیتی۔ ایس تقریب دیاں تصویراں پاکستان مسلم لیگ (ن) دے آفیشل ٹویٹر اکاؤنٹ اُتے وی شیئر کیتیاں گئیاں، جیہناں نوں سوشل میڈیا ورتیندڑاں(صارفین) نے پسند کیتا۔
ٹویٹر ورتیندڑاں دا کہنا اے کہ شہباز شریف نے اوس ویلے مولانا فضل الرحمان دے موقف دی تائید کیتی سی پر اج اوہناں نے آزادی دیہاڑ دے موقعے تے پرچم کشائی کر کے ثابت کر دتا کہ پاکستان اوہناں لئی سبھ توں ودھ کے اے۔ شہباز شریف ولوں پرچم کشائی اُتے اوہناں دی بہت تعریف وی کیتی گئی۔ چیتے رہوے کہ الیکشن کمیشن دے دفتر ساہمنے متحدہ اپوزیشن دے احتجاج دے موقعے تے خطاب کردے ہوئے مولانا فضل الرحمان نے آکھیا سی کہ ہر سال 14اگست نوں آزادی دیہاڑ منایا جاندا اے پر ہن اسیں 14اگست نوں آزادی دیہاڑ نہیں منا سکدے کیونکہ ساڈا حق کھوہ لیا گیا اے۔ مولانا فضل الرحمان دے جھیڑوے بیان اُتے شہباز شریف نے وی ہاں وچ ہاں ملائی۔ اوہناں نے آکھیا کہ میں فضل الرحمان نال آں ، کیہ 14اگست نوں شفاف الیکشن دی خشی منا سکدے آں ایہدا جواب نفی وچ اے۔ایس توں وکھ آزادی دیہاڑ نہ منان دے جھیڑوے(متنازعہ) بیان اُتے جمعیت علمائے اسلام (ف) دے سربراہ مولانا فضل الرحمان تے مسلم لیگ (ن) دے صدر شہباز شریف خلاف مقدمے دی درخاست جمع کروا ئی گئی اے۔ دوویں رہنماواں خلاف مقدمے دی درخاست لاہور دی سیشن کورٹ وچ جمع کروائی گئی۔ درخاست گزار نے اپنی درخاست وچ آکھیا اے کہ مولانا فضل الرحمان نے 8اگست نوں جھیڑوی (متنازعہ)تقریر کیتی۔ اوہناں دے 14اگست نہ منان دے بیان دی وجہ توں لوکائی دے جذبات مجروح ہوئے، اوہناں دی تقریر بغاوت دے زمرے وچ آؤندی اے۔ شہباز شریف نے وی لوکائی نوں 14اگست نہ منان دا آکھیا ۔ درخاست وچ آکھیا گیا کہ عدالت فضل الرحمان تے شہباز شریف خلاف مقدمے دا حکم دیوے۔ درخاست مگروں سیشن عدالت نے ایس ایچ او ماڈل ٹاؤن نوں نوٹس جاری کردے رپورٹ منگی ہوئی اے۔
