اسلام آباد( پاکستان پوائنٹ نیوز13۔اگست۔2018ء ) پاکستان تحریک انصاف دے چیئرمین عمران خان نے آکھیا اے کہ وزیر اعلا پنجاب دا فیصلا اجے نہیں ہویا۔ پیر نوں قومی اسمبلی دے افتتاحی اجلاس وچ رلت تے حلف چُکن مگروں پی ٹی آئی چیئرمین عمران خان پارلیمنٹ توں جان لگے تے اوہناں نوں میڈیا نمائندیاں نے گھیر لیا۔ ایس موقعے تے عمران خان نے تھوڑی جہی گل بات کیتی۔
پرچاکاراں نال گل بات کردے ہوئے اوہناں دا کہنا سی کہ میں ایس وار بہت جوش نال 14اگست مناواں گا۔ اک سوال دے جواب وچ اوہناں نے آکھیا کہ اجے وزیر اعلا پنجا ب دا فیصلا نہیں ہویا۔ جیہدے اُتے پرچا کار نے سوال کیتا کہ کیہ وزیر اعلا پنجاب دا چناؤ مشکل فیصلا اے ،جیہدا عمران خان نے کوئی جواب نہ دتا تے ہسدے ہوئے اگانہ چلے گئے۔ چیتے رہوے کہ پنجاب اسمبلی وچ تحریک انصاف نے 123سیٹاں اُتے کامیابی حاصل کیتی تے 28آزاد امیدوار وی پی ٹی آئی وچ رلتی ہو گئے نیں، جیہدے مگروں پی ٹی آئی دی گنتی 142ہو گئی۔ سوانیاں دیاں مخصوص سیٹاں تے اقلیت دیاں 4سیٹاں لین مگروں پنجاب اسمبلی وچ تحریک انصاف دے ارکان دی گنتی 179ہو گئی اے۔
