فارم45اُتے90فیصد پولنگ ایجنٹاں دے دستخط نہ ہون دا انکشاف

فارم45اُتے90فیصد پولنگ ایجنٹاں دے دستخط نہ ہون دا انکشاف

لاہور( پاکستان پوائنٹ نیوز13۔اگست۔2018ء ) عام انتخابات2018بارے الیکشن کمیشن دی ویب سائٹ اُتے جاری کیتے گئے فارم 45اُتے 90فیصدپولنگ ایجنٹاں دے دستخط ای نہیں نیں، دستخط نہ ہون اُتے معاملا مشکوک ہو گیا اے۔تفصیل مطابق عام انتخابات 2018بارے الیکشن کمیشن دی ویب سائٹ اُتے جاری کیتے گئے فارم 45اُتے 90فیصدپولنگ ایجنٹاں دے دستخط ای نہیں نیں۔ ترجمان الیکشن کمیشن نے وی ایس گل نوں منیا اے کہ پولنگ ایجنٹاں دے دستخط ضروری نہیں نیں۔

اوہناں نے آکھیا کہ فارم 45اُتے پولنگ ایجنٹاں دے دستخط لئی کوئی تھاں وی نہیں اے پر ایہدے اُلٹ الیکشن ایکٹ 2017دے سیکشن90(12) وچ واضح اے کہ پریزائیڈننگ افسر پولنگ سٹیشن اُتے پولنگ ایجنٹ توں دستخط لئے گا۔ قومی اخبار نے ملک بھر وچ 12ہزار پولنگ سٹیشناں دے فارم 45دا تجزیہ کیتا ۔ جیہدے وچ ایہ گل ساہمنے آئی اے کہ 90فیصد فارم 45اُتے پولنگ ایجنٹاں دے دستخط نہیں نیں۔

ایہدے اُتے پلڈاٹ دے سربراہ احمد بلال محبوب نے آکھیا کہ مینوں بڑی حیر ت اے کہ جتن والے امیدوار نے وی فارم 45اُتے دستخط نہیں کیتے۔ جدکہ عام حالات وچ ہارن والے پولنگ ایجنٹ دستخط نہیں کردے کیونکہ دستخط کرن دا مطلب ہار مننا ہوندا اے۔پر جے فارم 45اُتے جتن تے ہارن والے دوویں پولنگ ایجنٹاں نے دستخط نہیں کیتے تے ایہدے توں شک پیدا ہوندا اے تے اوہدیاں تحقیقات ضروری نیں۔

سابق سیکرٹری الیکشن کمیشن کنور دلشاد نے آکھیا کہ جے ایہ گل ٹھیک اے تے ایہ الیکشن 2018دی وڈی دھاندلی اے۔ ایہ الیکشن ایکٹ2017دی واضح خلاف ورزی اے ایہدے ذمے وار پریزائیڈنگ افسر نیں۔ اوہناں نے آکھیا کہ جے اسیں الیکشن 2013دا جائزہ لئے تے اوس ویلے الیکشن ٹربیونلز نے کئی حلقیاں دے فارم 14اُتے دستخط نہ ہون بارے شک دا اظہار کیتا سی۔ ایس الیکشن وچ وی الیکشن ٹربیونلز شک دا اظہار کر سکدے نیں۔ قومی اخبار نے فارم 45اُتے دستخطاں دی پُن چھان لئی این اے 18،این اے 55،این اے 213، این اے 246، این اے 249سنے ہور حلقیاں دا جائزہ لیا اے۔