اسلام آباد( پاکستان پوائنٹ نیوز13۔اگست۔2018ء ) پاکستان تحریک انصاف الیکشن 2018وچ کامیابی حاصل کرن مگروں پاکستان دی وڈی جماعت بن گئی اے۔ تحریک انصاف نے خیبرپختونخوا وچ حکومت بنان دے نال نال پنجاب وچ وی حکومت بنان لئی لک بنھیا ہویا اے۔ پاکستان تحریک انصاف نے حکومت دے پہلے 100دناں دے پلان دا اعلان کیتا، جیہدے وچ پاکستان تحریک انصاف نے حکومت وچ آ ن مگروں اک کروڑ نوکریاں دین دا اعلان وی کیتا جیہدے اُتے پاکستان تحریک انصاف نوں ڈاڈھی تنقید دا نشانہ وی بنایا گیا۔
ملکی معیشت وچ آؤندے وگاڑ تے باہرلے ملکاں دے قرضیاں دا بھار گھٹ کرنا پاکستان تحریک انصاف دی حکومت لئی اک نواں تے سبھ توں وڈا چیلنج ہوئے گا۔ اک پاسے جتھے پاکستان تحریک انصاف اپنی حکومت بارے لائحہ عمل تے حکمت عملی تیار کر رہی اے اوتھے دوجے پاسے بھراواں وچکار اختلاف صاف نظر آ رہیا اے۔ مسلم لیگ (ن) دے رہنما و سابق گورنر محمد زبیر نے مائیکرو بلاگنگ ویب سائٹ ٹویٹر اُتے اپنے پیغام وچ اک تصویر شیئر کیتی تے اپنے بھر ا و پاکستان تحریک انصاف دے مرکزی رہنما اسد عمر نوں تنقید دا نشانہ بنایا۔
محمد زبیر نے اخبار دی اک تصویر شیئر کیتی جیہدے اُتے سرخی سی کہ پاکستان تحریک انصاف دی حکومت دے پہلے 100دناں وچ لوکائی نوں کوئی ریلیف ملن دی آس نہیں اے۔ جیہدے اُتے محمد زبیر نے آکھیا کہ انج دیاں خبراں بعدوں ای ساہمنے آ رہیاں نیں جدکہ عام انتخابات توں پہلاں تحریک انصاف نے حکومت وچ آن مگروں پہلے 100دناں وچ لوکائی نوں ریلیف دین دا وعدہ کیتا سی۔ایتھے ایہ گل ذکر جوگ(قابل ذکر) اے محمد زبیر تے تحریک انصاف دے رہنما و متوقع وزیر خزانہ اسد عمر آپس وچ بھرا بھرا وی نیں۔
