اسلام آباد( پاکستان پوائنٹ نیوز13۔اگست۔2018ء ) عوامی مسلم لیگ دے سربراہ شیخ رشید نے آکھیا اے کہ پیپلز پارٹی تے (ن) لیگ اکٹھیاں نہیں چلن گیاں۔ پارلیمنٹ ہاؤس اسلام آباد دے باہر میڈیا نال گل بات کردے ہوئے شیخ رشید نے آکھیا کہ قوم نے عمران خان دے موڈھیاں اُتے بہت وڈی ذمے واری پائی اے۔ جمہوریت نوں اگانہ لے کے چلاں گے، آرام نوں اپنے اُتے حرام قرار دے کے لوکائی دا پاکستان بنان لئی کم کراں گے۔
اوہناں نے آکھیا کہ اپوزیشن دیاں ساریاں جماعتاں نال دوستی دا ہتھ ودھاواں گے۔اللہ نے اج ای مضبوط تے محفوظ پاکستان دتا اے۔شیخ رشید نے آکھیا کہ میں مولانا فضل الرحمان نوں وی جشن آزادی دی مبارکباد دے رہیا واں۔ 22ورھیاں توں مولانا فضل الرحمان نے اسلام تے کشمیر لئی کیہ کیتا؟پیپلز پارٹی تے مسلم لیگ (ن) دے اتحاد بارے شیخ رشید نے آکھیا کہ مسلم لیگ (ن) تے پیپلز پارٹی اکٹھیاں نہیں چلن گے۔
آصف زرداری 14سال دی کُڑی نہیں اوہ سبھ توں سیانے سیاست دا ن نیں۔ اوہناں نوں پتا اے کہ کدوں کیہ کرنا اے۔ اوہناں نے آکھیا کہ لوک آکھدے سن شیخ رشید اسمبلی وچ نہیں ہوئے گا، اج شیخ رشید اسمبلی وچ اے تے اوہ لوک نہیں نیں۔ اوہناں دا کہنا سی کہ اج میں سپیکر صاحب نوں مبارکباد دے کے آکھیا ہن کیہدا مائیک بند کرو گے۔ سربراہ عوامی مسلم لیگ شیخ رشید نے آکھیا کہ عمران خان جتھے مناسب سمجھن گے اوتھے مینوں لان گے۔ عمران خان دی حکومت وچ شیخ رشید دی آواز غریباں دی آواز ہوئے گی۔
