عمران نُوں جِتاون لئی 35 توں ودھ حلقیاں وچ جھُرلو پھیریا گیا: خورشید شاہ

اسلام آباد( پاکستان پوائنٹ نیوز30۔جولائی۔2018ء ) پاکستان پیپلز پارٹی دے رہنما سید خورشید شاہ نے 2018دیاں چوناں دے حوالے نال اپنے خدشیاں دا اظہار کردیاں آکھیا اے کہ عمران خان نُوں جِتاون لئی 35 توں ودھ حلقیاں وچ جھُرلو پھیریا گیا‘ الیکشن دے نتیجے ویکھ کے لگدا اے عمران خان دی ارینج میرج ہوئی‘ الیکشن دا پوسٹ مارٹم کرنا اے تاں صرف کجھ حلقے کھول لوو۔ میڈیا نال گل بات کردیاں پیپلز پارٹی دے رہنما خورشید شاہ نے آکھیا کہ عمران خان نُوں جِتاون لئی اِک نہیں سگوں فُل پنکچر لائے گئے‘ ایہہ پنکچر عمران خان دے سارے حلقیاں وچ وی لائے گئے۔ اوہناں آکھیا کہ یوسف رضا گیلانی، رسول بخش چانڈیو، فیصل صالح حیات، اعجاز جاکھرانی تے سعد رفیق دے حلقیاں وچ پنکچر لائے گئے۔