اسلام آباد ( پاکستان پوائنٹ نیوز30۔جولائی۔2018ء ) شاعر مشرق علامہ محمد اقبال دی نُونہہ جسٹس (ر) ناصرہ جاوید اقبال نُوں ستمبر 2018ء وچ صدرِ پاکستان چُنے جان دا چوکھا امکان اے۔ ایہ پاکستان دی پہلی خاتون صدر ہو سکدیاں نیں۔ سابق چیئرمین سینیٹ محمد میاں سومرو دا ناں وی صدر لئی پیش کیتا گیا پر ناصرہ اقبال نُوں صدر بناون دے سُجھاء اُتے غور کیتا جا رہا اے تے نویں حکمران جماعت دے ایس سُجھاء نُوں لوکاں ولوں واہوا سلاہیا جا رہیا اے۔
جسٹس (ر) ناصرہ جاوید اقبال سپریم کورٹ دے سابق جج، شاعر مشرق علامہ اقبال دے پُتر جسٹس (ر) جاوید اقبال مرحوم دی بیوی نیں۔میڈیا رپورٹ وچ دعوا کیتا گیا اے کہ تحریک انصاف دے نامزد وزیر اعظم عمران خان نے جسٹس (ر) ناصرہ جاوید اقبال نُوں موجودہ صدر ممنون حُسین دی صدارت دی مُدت جیہڑی 8 ستمبر 2018ء نُوں پُوری ہو رہی اے‘ دے مگروں صدر چُنے جاون دے سُجھاء اُتے مثبت رائے ظاہر کیتی اے۔
عمران خان ولوں ایس سُجھاء نُوں سلاہے جان مگروں جسٹس (ر) ناصرہ نُوں صدر دے طور اُتے چُنے جاون دے حوالے نال تیاریاں بارے وی غور کیتا جا رہیا اے۔ تحریک انصاف وچ وی ایس صلاح نُوں بہت سلاہیا جا رہا اے تے سنجیدگی نال ایس معاملے اُتے غور شروع کر دِتا گیا اے۔ کجھ حلقے ایہ وی امکان ظاہر کر رہے نیں کہ ناصرہ جاوید اقبال دی صدر مملکت دے طور تے نامزدگی اُتے مصور پاکستان دی نُونہہ ہون کارن اپوزیشن جماعتاں وی اوہناں دی حمایت کر سکدیاں نیں۔
