اسلام آباد( پاکستان پوائنٹ نیوز30۔جولائی۔2018ء ) پیپلز پارٹی نے قومی اسمبلی وچ بلاول بھٹو زرداری نُوں اپوزیشن لیڈر دا عہدہ دین دے بدلے پنجاب اسمبلی میں ن لیگ دی حمایت دا پک کروا دِتا اے۔ پیپلز پارٹی نے اپوزیشن لیڈر دے عہدے دی حمایت لئی ایم ایم اے تے آزاد اُمیدواراں نال صلاح مشورے دا عمل تیز کر دِتا اے۔ مسلم لیگ ن نُوں قومی اسمبلی وچ اپوزیشن لیڈر دا عہدہ دین دے بدلے پنجاب اسمبلی وچ حمایت تے سینٹ وچ اپوزیشن لیڈر دی سیٹ دین دی پیشکش دا اجے تیکر مثبت جواب نہیں دِتا۔
وسیلیاں مطابق پاکستان پیپلز پارٹی نے قومی اسمبلی وچ پہلی وار آون والے پارٹی چیئرمین بلاول بھٹو زرداری نُوں اپوزیشن لیڈر دا اہم عہدہ دوان لئی اپوزیشن دیاں دُوجیاں سیاسی جماعتاں نال رابطے تیز کر دِتے نیں۔وسیلیاں مطا بق پی پی پی ولوں پاکستان مسلم لیگ ن نُوں قومی اسمبلی دی اپوزیشن لیڈر شپ دے بدلے پنجاب اسمبلی وچ حمایت تے سینٹ وچ اپوزیشن لیڈر دی پیشکش کیتی گئی اے پر مسلم لیگ (ن)ولوں پی پی پی دے ایس سُجھاء دا حالے تیک جواب نہیں دِتا گیا اے تے مسلم لیگ ن دے کجھ حلقے وی ایس سُجھاء دی مخالفت کردیاں اپوزیشن لیڈر دا اہم عہدہ اپنے کول رکھن اُتے زور دے رہے نیں۔
وسیلیاں مطابق پیپلز پارٹی نے قومی اسمبلی وچ ممکنہ اپوزیشن وچ شامل ایم ایم اے سنے دُوجیاں سیاسی جماعتاں دے نال وی اپنے رابطے تیز کیتے ہوئے نیں تے ایہناں وچ قومی اسمبلی اندر اپوزیشن لیڈر لئی بلاول بھٹو دی حمایت کرن دیاں کوششاں شروع کر دتیاں نیں۔ ایس سلسلے وچ پارٹی دے اہم تے سینئررہنما الیکشن دے اگلے دیہاڑے ای سیاسی جماعتاں نال رابطیاں لئی سرگرم ہو گئے نیں۔
