لاہور( پاکستان پوائنٹ نیوز27۔جولائی۔2018ء ) سینئر پرچا کار حامد میر نے آکھیا اے کہ تحریک انصاف نے پنجاب وچ مسلم لیگ (ن) نوں حکومت نہ بنان دتی تے وفاق وچ پی ٹی آئی لئی اوکڑاں کھڑیاں ہو جان گیاں، وفاق وچ سیاسی جماعتاں رلکے اپنا وزیر اعظم لیا سکدیاں نیں، جیہدے نال اک نواں جھیڑا کھڑا ہو جائے گا۔ اوہناں نے نجی ٹی وی نال گل بات کردے ہوئے دسیا کہ مسلم لیگ (ن) نوں پنجاب وچ سادہ اکثریت نہیں ملی پر عددی اکثریت حاصل اے۔
پنجاب دی لوکائی نے اوہناں نوں مینڈیٹ دتا اے ایس لئی وفاق دی وڈی جماعت تحریک انصاف نوں لوکائی دے مینڈیٹ دا احترام کرنا چاہیدا تے مسلم لیگ (ن) دے حکومت بنان دی راہ وچ رکاوٹ نہیں بننا چاہیدا۔ حامد میر نے آکھیا کہ سیاسی جماعتاں دھاندلی دے معاملے اُتے متحد نظر آؤندی اے ، پیپلز پارٹی، مسلم لیگ (ن)، ایم کیو ایم، جے یو آئی (ف) سنے سبھ نے دھاندلی دے الزام لائے نیں۔
جمعیت علماء اسلام (ف) دے سربراہ نے آل پارٹیز کانفرنس سدی اے۔ کانفرنس وچ اوہ ساریاں سیاسی جماعتاں دے لائحہ عمل دا اعلان کرن گے۔ سینئر پرچا کار حامد میر نے آکھیاکہ اک گل طے اے کہ جے تحریک انصاف نے مسلم لیگ (ن) نوں پنجاب وچ حکومت نہ بنان دتی تے فیر سبھ اپوزیشن جماعتاں مسلم لیگ (ن)، پیپلز پارٹی، ایم کیو ایم تے ہور سیاسی جماعتاں رلکے وفاق وچ عمران خان نوں وزیر اعظم نہیں بنن دین گیاں۔
بلکہ ساریاں اپوزیشن جماعتاں اپنا سانجھا(متفقہ) وزیر اعظم لے آن گیاں۔ جیہدے اُتے تحریک انصاف لئی وفاق وچ حکومت بنان لئی اوکڑاں پیدا ہو سکدیاں نیں۔حامد میر دا کہنا سی کہ تحریک انصاف نوں وی (ن) لیگ دے مینڈیٹ دا احترام کرنا چاہیدا جیویں مسلم لیگ (ن) نے 2013وچ خیبرپختونخوا وچ تحریک انصاف دے مینڈیٹ دا کیتا سی۔
