اسلام آباد( پاکستان پوائنٹ نیوز27۔جولائی۔2018ء ) پی ٹی آئی چیئرمین عمران خان نے عام انتخابات 2018وچ کامیابی حاصل کرن مگروں اپنی جماعت توں تبدیلی لیانا شروع کر دتی اے۔ پی ٹی آئی چیئرمین عمران خان نے پچھلے دیہاڑے اپنے پہلے پالیسی خطاب توں پہلاں اک اجلاس سدیا، اجلاس وچ پارٹی عہدیداراں تے رہنماواں نے رلت(شرکت) کیتی۔ ایس اجلاس وچ پی ٹی آئی چیئرمین عمران خان نے رلتیاں نوں اپنے آؤندے لائحہ عمل بارے دسیا۔
عمران خان نے ایس دوران اپنے کسے وی نیب زدہ رکن اسمبلی نوں وزارت نہ دین دا اعلان کیتا اے۔ بنی گالا وچ خطاب توں پہلاں ہون والے پارٹی اجلاس وچ پارٹی چیئرمین عمران خان نے واضح طور اُتے آکھیا کہ اسیں جو آکھیا اے اوہ کرکے وکھانا اے، اسیں اوہ سبھ کرنا اے جو ساڈے توں پہلیاں حکومتاں نے نہیں کیتا۔ تے ایہدے لئی سانوں اپنی ذات دی نفی کرنی پئے گی۔
اوہناں نے آکھیا کہ جے وفاق، پنجاب، خیبرپختونخوا تے بلوچستان وچ وی ساڈی حکومت بندی اے تے کسے نیب یاں کرپشن زدہ رکن اسمبلی نوں وفاقی یاں صوبائی حکومت دا حصہ نہیں بنایا جائے گا۔ پر اوہ اپنے آپ نوں کلیئر کروا کے وفاقی یاں صوبائی وزیر بن سکدا اے۔چیتے رہوے کہ پاکستان تحریک انصاف دے تن ایسے رہنما نیں ،جیہناں وچوں اک پنجاب دی وزارت اعلا دی دوڑ وچ شامل سن جدکہ دو وفاقی حکومت وچ اہم ذمے واریاں لین دیاں کوششاں کر رہے سن، پر تحریک انصاف دے چیئرمین عمران خان نے ایس حوالے نال پارٹی اجلاس وچ آکھیا کہ کرپشن اُتے کوئی کمپرومائز نہیں کیتا جائے گا۔
