لاہور( پاکستان پوائنٹ نیوز26۔جولائی۔2018ء ) تحریک انصاف نے پنجاب وچ حکومت بنان دا فیصلا کر لیا۔ تفصیل مطابق پچھلے دیہاڑے ہون والے پاکستان دے 10ویں الیکشن دے غیر سرکاری غیر حتمی نتیجے آن دا سلسلا جاری اے۔ہن تیکر ملن والیاں اطلاعواں مطابق تحریک انصاف آسانی نال وفاقی حکومت بنان دی پوزیشن وچ آ گئی اے۔پر ایہدے نال نال تحریک انصاف دی پنجاب وچ وی پوزیشن مضبوط ہوندی جا رہی اے۔
جیہدے مگروں تحریک انصاف نے ایس بارے غور کرنا شروع کر دتااے کہ حکومت بنان لئی کیہڑی کیہڑی جماعت بہتر رہوے گی ۔ میڈیا رپورٹ و چ دسیا گیا اے کہ پاکستان تحریک انصاف نے 5سیاسی جماعتاں نوں حکومت بنان لئی دعوت دین دا فیصلا کر لیا اے۔ عمران خان نے سینئر پارٹی رہنماواں نال حکومت سازی لئی صلاح کیتی۔ایس دوران پنجاب وچ حکومت بنان لئی آزاد امیدواراں نال صلاح کرن دا فیصلا کیتا گیا اے۔ جدکہ پاکستان تحریک انصاف ولوں بلوچستان عوامی پارٹی نوں دعوت دین دا فیصلا وی ساہمنے آیا اے۔ ایس توں وکھ ہور جماعتاں نال وی صلاح دا فیصلا کیتا گیا اے۔ جیہناں وچ بی این پی، جی ڈی اے تے مسلم لیگ (ق) شامل اے۔
