لاہور( پاکستان پوائنٹ نیوز27۔جولائی۔2018ء ) پاکستان تحریک انصاف دے امیدوار علیم خان نے این اے 129وچ ووٹاں دی دوبارہ گنتی دی درخاست دے دتی۔ ریٹرننگ افسر نے علیم خان دی درخاست منظور کر لی، جیہدے مگروں آر او نے این اے 129دا انتخابی نتیجہ روک لیا اے۔ ریٹرننگ افسر نے کل سویرے 10وجے علیم خان تے ایاز صادق نوں سد لیا اے۔ ریٹرننگ افسر غلام مرتضی نے این اے 129دے ووٹاں دی فیر گنتی دا حکم دے دتا اے۔
علیم خان ولوں دائر درخاست وچ آکھیا گیا اے کہ این اے 129وچ نتیجے حقائق دے اُلٹ دتے گئے۔ پولنگ ایجنٹس نوں فارم 44تے 45دیاں کاپیاں نہیں دتیاں گئیاں۔ بیلٹ پیپرز دی گنتی ویلے پولنگ ایجنٹس نوں باہر کڈھ دتا گیا سی۔ یاد رہوے کہ قومی اسمبلی دے حلقہ این اے 129لاہور VIIتوں پاکستان مسلم لیگ (ن) دے سردار ایاز صادق اک لکھ 3ہزار 21ووٹ لے کے کامیاب قرار دتے گئے۔ الیکشن کمیشن دے غیر سرکاری غیر حتمی نتیجے مطابق پاکستان تحریک انصاف دے علیم خان 94ہزار 879ووٹاں نال دوجے جدکہ تحریک لبیک پاکستان دے محمد یوسف 12ہزار 875ووٹاں نال تیجے نمبر اتے رہے۔
