لاہور( پاکستان پوائنٹ نیوز16۔جولائی۔2018ء ) لاہوروں اعلا کلاس دا باورچی کسے ویلے وی اڈیالا جیل اپڑ سکدا اے۔ تفصیل مطابق مشہور پرچا کار منصور آفاق دا اپنے اک کالم ’ایون سے اڈیالہ‘ وچ کہنا اے کہ رات کسے دی آمد اُتے اڈیالا جیل دیاں کندھاں گُنگنا اُٹھیاں سن۔ جیل وچ جشن دا سماں اے۔ کمرے سجا دتے گئے نیں۔سارا ضرورت دا سامان جیل اپڑ دتا گیا۔ فریج کھان پین دیاں شیواں نال بھری پئی اے۔
ٹیلی وژن نال ڈش جوڑ دتی گئی اے۔ اخبار اک پاسے بڑے سلیقے نال رکھ دتے گئے نیں۔ بیڈ اُتے نویاں تے قیمتی چادراں وچھا دتیاں گئیاں نیں۔ بازاروں نویں تکیے منگوائے گئے نیں۔ اٹیج باتھ رومز وچ سارا ضروری سامان اپڑا دتا گیا اے۔ چھ مشقتی کم کاج لئی حاضر کھلوتے نیں جیہناں وچ دو سوانیاں وی نیں۔ اجے تیکر تے کھانا باہروں آیا اے پر لاہوروں اک بہت اعلا کلاس دا باورچی کسے ویلے وی اڈیالا جیل اپڑسکدا اے۔
اوہناں دا اپنے کالم وچ کہنا اے کہ سپرنٹنڈنٹ بالکل اُنجے ای تن قیدیاں پچھے بھج رہیا اے جیویں کیسے مرید دے گھر کوئی پیر آ گیا ہوئے پر ایون فیلڈ والیاں سہولتاں کتھے تے اڈیالا جیل کتھے۔چیتے رہوے کہ احتساب عدالت ولوں ایون فیلڈ ریفرنس وچ سزا پان والے مسلم لیگ (ن) دے قائد میاں نواز شریف تے اوہناں دی دھی مریم نواز اڈیالا جیل وچ قید نیں۔وسیلیاں مطابق نواز شریف نوں اڈیالا جیل دے ہائی سکیورٹی زون وچ رکھیا گیا اے۔
