حیدر آباد( پاکستان پوائنٹ نیوز16۔جولائی۔2018ء ) نیشنل ہائی وے اُتے ہالا نیڑے ٹریفک حادثے دے نتیجے وچ 17بندے ہلاک تے 13زخمی ہوگئے، زخمیاں وچوں 4دی حالت خطرے وچ۔ تفصیل مطابق نیشنل ہائی وے اُتے ہالا نیڑے ٹریفک حادثے دے نتیجے وچ 17بندے ہلاک تے 13زخمی ہوگئے، زخمیاں وچوں 4دی حالت خطرے وچ اے۔حادثہ قومی شاہراہ اُتے ضلع مٹیاری وچ بھٹ شاہ تے ہالا وچکار پیر دی سویر اوس ویلے ہویا جدوں اک ٹریلر نے سڑک کنڈھے کھلوتی بس نوں ٹکر مار دتی۔
بس اندر اک ای خاندان دے جی سوار سن جو سکرنڈ وچ ویاہ وچ رلت(شرکت) مگروں گوٹھ محمد ہاشم نیو حیدر آباد آ رہے سن کہ ایس دوران اوہناں دی بس دا ٹائر پنکچر ہو گیا۔ ڈرائیور بس کھڑی کر کے ٹائر بدل رہیا سی کہ ایس دوران تیزی وچ پچھوں آن والے ٹریلر نے ٹکر ماردتی۔ ٹکر دے نتیجے وچ 17بندے ہلاک تے 13زخمی ہو گئے، جیہناں نوں ایدھی ایمبولینساں راہیں سول ہسپتال حیدر آباد لیاندا گیا، جتھے 4زخمیاں دی حالت خطرے وچ دسی گئی اے۔
حادثہ رات ڈھائی وجے ہویا۔ حادثے ویلے بُہتے مسافر باہر نکل کے بس نال سڑک کنڈھے بیٹھے سن۔ حادثے مگروں ٹریلر دا ڈرائیور تے کنڈیکٹر فرار ہون وچ کامیاب ہو گئے۔ ایدھی وسیلیاں مطابق ہلاک ہون والے بندیاں وچ شنیلا، جنید، شاہ میر، منیر، محمد سلیم، امتیاز، امین، ایوب، سہیل، راشد، شہزاد، فرحان، ثمینہ تے صاحبزادی دے ناں پتا لگے نیں۔ ایدھی رضا کاراں نے 16ہلاک بندیاں نوں نہوا کے میتاں اوہناں دے وارثاں دے حوالے کر دتیاں جدکہ زخمیاں نوں سول ہسپتال وچ ڈاکٹری امداد دتی جا رہی اے۔
