لاہور،راولپنڈی( پاکستان پوائنٹ نیوز07۔جولائی۔2018ء ) سابق وزیر اعظم نواز شریف تے مریم نواز دی گرفتاری مگروں اوہناں نوں سینٹرل جیل کوٹ لکھپت لاہور یاں اڈیالا جیل راولپنڈی وچ رکھیا جا سکدا اے۔ نجی ٹی وی مطابق احتساب عدالت ولوں سزا سُنائے جان مگروں نیب نے نواز شریف تے مریم نواز نوں فوری گرفتار کرن دا فیصلا کیتا، اوہناں نوں لندن واپسی اُتے ائر پورٹ توں ای گرفتار کیتا جائے گا۔
جیل وسیلیاں مطابق نواز شریف تے مریم نواز دی گرفتاری مگروں دو جیلاں وچ پورے انتظامات کر لے گئے نیں۔ اوہناں نوں سینٹرل جیل کوٹ لکھپت لاہور یاں اڈیالا جیل راولپنڈی وچ رکھیا جا سکدا اے۔وسیلیاں مطابق نواز شریف تے مریم نواز نوں جس جیل وچ رکھیا جائے گا اوہنوں سب جیل قرار دتا جا سکدا اے۔ بیتے ویلے وچ وی سابق وزیراعظم بے نظیر بھٹو نوں سہالا نیڑے اک ریسٹ ہاؤس وچ رکھیا گیا سی۔
ایسے طرحاں جنرل یحی خان نوں وی جہلم وچ اک ریسٹ ہاؤس وچ رکھیا گیا سی۔ وسیلیاں مطابق کسے مجرم نوں اودوں تیکر جیل وچ رکھیا جاندا اے جدوں تیکر اوہدی جان نوں خطرہ ہوئے، کسے مجرم نوں جے سب جیل وچ رکھیا جائے تے اوہنوں بی کلاس آکھیا جاندا اے۔ جیل رولز 245دے تحت بی کلاس وچ سابق وزیر اعظم دی خدمت لئی 2قیدی دتے جاندے نیں۔ بی کلاس دے تحت مجرم جیل وچ وردی دی بجائے عام کپڑے پا سکدا اے۔ مجرم نوں گھر دا روٹی پانی دتا جا سکدا اے یاں کھان پکان دی اجازت وی ہوندی اے۔ مجرم نوں ٹی وی ، اے سی تے اخبار لئی سیکرٹری داخلا دی اجازت چاہیدی دی ہوندی اے۔
