لکی مروت( پاکستان پوائنٹ نیوز07۔جولائی۔2018ء ) پاکستان بھر وچ ہر آؤندے دن نوں پانی دی کم وچ وادھا ہو رہیا اے تے ایسے گل نوں مُکھ رکھدے ہوئے سپریم کورٹ نے 2ڈیمز بنان دا حکم جاری کیتا سی۔ پاکستان وچ ڈیمز دی اُساری(تعمیر) لئی آپ چیف جسٹس آف پاکستان جسٹس ثاقب نثار نے وی اپنی جیب وچوں 10لکھ رُپئے عطیہ دتا۔ پر ہن بنوں دے اک پڑھیار نے میٹرک دے پرچیاں وچ پوزیشن لین اُتے ملن والی انعامی رقم ڈیمز دی اُساری لئی عطیہ کرن دا اعلان کر دتا۔
لکی مروت دے پڑھیار محمد نوں میٹرک دے امتحان وچ پوزیشن لین اُتے انعام دتا گیا سی۔ جیہنوں اوہنے ڈیم لئی عطیہ کرن دا اعلان کیتا اے۔ پر سوشل میڈیا اُتے ایہ خبرساہمنے آن مگروں سوشل میڈیا ورتیندڑاں(صارفین) نے نوجوان پڑھیار تے قوم دے ایس پُتر دے جذبے نوں سلاہیا اے۔سوشل میڈیا ورتیندڑاں دا کہنا اے کہ محمد نامی ایس پڑھیار نے انعامی رقم عطیہ کر کے اپنے ورگے کئی نوجوان تے اپنے عمر توں وڈے لوکاں لئی اک مثال قائم کر دتی اے ۔
چیتے رہوے کہ ایس توں پہلاں تیجی جماعت دے پڑھیار علی شیر نے جیب خرچ بچا کے تے کھڈونے ویچ کے جمع کیتے جان والے 10ہزار رُپئے ڈیماں دی اُساری لئی عطیہ کیتے سن۔علی شیر نے نجی ٹی وی دے دفتر اپڑ کے ایہ پیسے بیورو چیف دے حوالے کیتے جیہناں متعلقہ اکاؤنٹ وچ جمع کروان دی حامی بھری سی۔ ایس موقعے تے علی شیر دا کہنا سی کہ اوہنے ایہ پیسے اپنی جیب خرچ توں بچا کے رکھے سن جدکہ کُجھ پیسے پرانے کھڈونے ویچ کے اکٹھے کیتے۔
